Bjóða öllum skólum landsins nýtt matstæki

Þrjú sveitarfélög bjóða öllum skólum landsins nýtt matstæki þeim að kostnaðarlausu

Frá haustdögum 2016 hafa sveitarfélögin Árborg, Hafnarfjörður og Reykjanesbær verið í faglegu samstarfi um þýðingu og staðfæringu á stöðumatstæki sem nýtist skólum til að leggja mat á námshæfni, þekkingu og reynslu nemenda af erlendum uppruna á þeirra tungumáli. Í lok ársins 2018 bættist síðan Fellaskóli í Reykjavík inn í samstarfið.

Stöðumat fyrir erlenda nemendur

Stöðumatið er hýst á vefsíðu Menntamálastofnunar, en stofnunin tók einnig að sér að sækja um þýðingarréttinn til Skolverket í Svíþjóð. Efnið er öllum opið (Stöðumat fyrir erlenda nemendur | Menntamálastofnun (mms.is) en þar er að finna öll gögn sem þarf til að leggja Stöðumatið fyrir, svo sem kennsluleiðbeiningar, verkefni, skráningargrunna og samantektarskjöl. Þar eru einnig kynningarmyndbönd þar sem saga Stöðumatsins er kynnt, fyrirlögn hvers hluta fyrir sig, hagnýt atriði og niðurstöðu.

Mikil þörf hefur verið fyrir öflugt stöðumatstæki fyrir nemendur af erlendum uppruna hér á landi. Verkefnið miðar að því að byggja á styrkleikum og efla námshæfni nemenda og að bregðast sem fyrst við námsþörfum hvers og eins með snemmtæku mati og markvissri íhlutun á fyrstu stigum skólagöngunnar í nýju landi. Lögð er áhersla á að líta á Stöðumatið sem matstæki ekki próf og skiptist matið í þrjú stig:

1. stig – fyrri þekking og reynsla:

Styðja skólana í að staðsetja nemendur hvað varðar fyrri þekkingu og reynslu. Niðurstöður matsins auðvelda skólunum að skipuleggja nám nemandans út frá styrkleikum hans og þörfum. Kanna fyrri þekkingu og reynslu nemandans, t.d. varðandi tungumálakunnáttu, skólagöngu, styrkleika o.fl.

2. stig – læsi og talnaskilningur. 

Mat sem kannar lestrarfærni og talnaskilning nemandans á hans eigin móðurmáli.

3. stig – námsgreinar: 

Kanna kunnáttu nemandans í faggreinum skólans s.s. ensku, sögu, líffræði, stærðfræði o.fl. Gefur vísbendingar um fyrri kunnáttu nemandans og grundvöll til að skipuleggja nám og kennslu við hæfi. Þessi faggreinahluti er í vinnslu að hluta.

Margir skólar þegar að nýta stöðumatið 

Stýrihópur hefur leitt þessa mikilvægu þróunarvinnu en eftirtaldir skipa hópinn. Frá Árborg: Aneta Figlarska, ráðgjafi í kennslu barna af erlendum uppruna, Hrund Harðardóttir, kennsluráðgjafi og Þorsteinn Hjartarson, sviðsstjóri. Frá Hafnarfirði: Fanney Dóróthe Halldórsdóttir, sviðsstjóri, Kristrún Sigurjónsdóttir, kennsluráðgjafi fjölmenningar og Þórdís Helga Ólafsdóttir, fyrrv. sérkennslufulltrúi grunnskóla, nú kennari í Borgarholtsskóla. Frá Reykjanesbæ: Halldóra Fríða Þorvaldsdóttir, verkefnastjóri í íslensku sem öðru máli, Helgi Arnarson, sviðsstjóri og Kolfinna Njálsdóttir, deildarstjóri skólaþjónustu .

Stöðumatsverkefnið hefur fengið styrki úr Sprotasjóði og í kjölfar námskeiða, sem stýrihópurinn hefur staðið fyrir, hefur Stöðumatið verið tekið í notkun í mörgum skólum hér á landi, svo sem í Árborg, Hafnarfirði, Reykjanesbæ og Reykjavík. Fleiri sveitarfélög sem eru að stíga fyrstu skrefin hafa fengið námskeið í innleiðingu. Tveir framhaldsskólar, Borgarholtsskóli og Fjölbrautarskóli Suðurlands, eru farnir að nýta Stöðumatið, og fleiri eru að huga að innleiðingu þess enda eru sóknarfæri á því skólastigi.

Sjá einnig frétt um stöðumati á vef Mennta- og menningarmálaráðuneytisins