Breytingar á grunnskólastarfi frá og með 23. nóvember

Varfærnar breytingar á grunnskólastarfi verða frá mánudeginum 23. nóvember sem gilda til og með 1. desember nk. Við nýjar breytingar er áhersla lögð á að stíga varlega til jarðar og fara aðeins í aðgerðir eða breytingar sem tala í takti við sóttvarnarreglur heilbrigðisyfirvalda. Framkvæmdin er samræmd fyrir grunnskóla Hafnarfjarðarbæjar. 

Eftir yfirlegu skólastjórnenda og fræðsluyfirvalda í Hafnarfirði á nýrri reglugerð sóttvarnayfirvalda er það niðurstaðan að viðhafa í meginatriðum sama skipulag áfram til 1. desember og verið hefur í grunnskólunum allan nóvembermánuð. 

Fyrirkomulagið er í grunninn eftirfarandi:

• Nemendur eru áfram í sínum bekkjum í sínum kennslustofum sem mynda eitt hólf (5.-10. bekkur) eða tveir bekkir saman á yngsta stigi (1.-4. bekkur).
• Einu kennsluhólfi í einu verður leyft að sækja skólasöfnin verði því viðkomið en þau verða sótthreinsuð á milli hópa í mismunandi kennsluhólfum. 
• Nemendur á yngsta stigi fá áfram fullan kennsludag og frístundaheimili en frístundabílinn bætist nú við með sama skipulag frá því fyrr í haust. 
• Áfram munu nemendur í 5.-10. bekk vera með fjórar kennslustundir á dag í skólanum og aukna heimavinnu, mögulega með fjarfundum með kennurum eins og hver skóli og kennarar ákveða. Tímasetningar á viðveru í skóla hjá eldri nemendum geta breyst.
• Nemendur og kennarar í 5.-7. bekkjum hafa ekki lengur grímuskyldu í kennslustundum og skólalóðin er laus undan grímuskyldu fyrir alla nemendur en grímuskylda er áfram meðal nemenda og kennara/starfsmanna í 8.-10. bekk í kennslustofum og á göngum skólans. 
• Nýja reglugerðin gefur skólunum möguleika að skipuleggja frímínútur inn í skóladeginum, sökum þess að ekki er lengur hólfaskipting á skólalóðinni
• Kennsla íþrótta í íþróttahúsum og sundkennsla í sundlaugum er möguleiki sem hver skóli skoðar. Hver skóli mun kynna fyrir foreldrum sínum ákvarðanir.

Það hefur verið okkur mikilvægt að geta haldið úti matarþjónustu fyrir nemendur við þessar skerðingar á skólastarfi en það verkefni hefur ekki verið án áskorana. Þar hefur samvinna við Skólamat verið til fyrirmyndar þrátt fyrir erfiðar aðstæður fyrir fyrirtækið. Þannig var tekið upp á að afhenda nemendum hádegismat í einnota bökkum inni í kennslustofum en það bauð ekki upp á sömu gæði og afhending matar í matsal og jók bæði matseldina og matarsóun auk annarra flækjustiga. Nú er sú staða uppi að ekki fást lengur matarbakkar á landinu til að halda þessari framkvæmd áfram. Því hefur verið tekin sú ákvörðun að taka matsalina aftur í notkun en með breyttri framkvæmd, þ.e. hólfun og afhendingu hádegismatar yfir lengri tíma en áður sökum minni hópa í salnum hverju sinni. Ef einstaka skólar geta ekki komið öllum nemendum sem eiga pantaðan hádegismat í matsal, eða geta sótt hann þar og farið með í kennslustofur, munu elstu nemendur sumra skóla fá einfaldari mat, þ.e. samloku, vefju, pasta o.þ.h., í stofur sem sinn hádegisverð. Þetta er ekki ákjósanlegasta staðan en virðist vera eini framkvæmanlegi möguleikinn í þeirri viðleitni að færa öllum nemendum sem eru í áskrift matinn sinn og þurfa ekki að fella hann niður. Hver skóli mun kynna fyrirkomulagið nánar fyrir foreldrum. 

Starfsfólk Hafnarfjarðarbæjar þakkar öllum hlutaðeigandi og þá ekki síst nemendum og forráðamönnum sýndan skilning og þolinmæði gagnvart stöðugum breytingum og aðlögun að nýjum aðstæðum.