Hafnarfjörður á toppnum í menningarmálum

Þjónustan í Hafnarfirði eflist milli ára

Hafnarfjarðarbær skorar hæst allra sveitarfélaga í þjónustukönnun Gallup litið til þess hvernig sveitarfélagið sinnir menningarmálum. Allir tólf þjónustuþættirnir sem Gallup mældi fyrir Hafnarfjarðarbæ hækka milli ára utan eins sem stendur í stað.

Ljóst er að Hafnfirðingar elska bæinn sinn, því hæst er skorið þegar spurt er hversu ánægðir eða óánægðir þeir séu með sveitarfélagið sem stað til að búa á. Hafnarfjarðarbær er einnig ofan við meðaltal í öllum þáttunum.

„Þetta eru skýr skilaboð frá íbúum. Að 91% séu ánægð með Hafnarfjörð sem stað til að búa á segir okkur að við erum á réttri leið. Það er hvatning til okkar að halda áfram að bæta þjónustuna dag frá degi,“ segir Valdimar Víðisson bæjarstjóri.

Ánægja með Hafnarfjörð eykst

Sjá má á tölunum að ánægja Hafnfirðinga með bæinn sinn sem búsetustað eykst ár frá ári. Alls voru mjög ánægðir 42% árið 2021, en 49% árið 2023. Nú í ár eru þeir 55%.

„Það er mjög ánægjulegt að sjá ánægjuna aukast ár frá ári. Þetta sýnir að umbætur í þjónustu og innviðum eru að skila sér. Líka að Hafnfirðingar eru stoltir af bænum sínum og samfélaginu,“ segir Valdimar.

Skipulagsmál sækja einnig á. Mjög ánægðum með þau fjölgar úr 9% í 12% milli ára. Mjög óánægðum fækkar úr 7% í 5%. Ljóst er að 60% eru ánægð eða mjög ánægð með skipulagsmálin.

Ánægja Hafnfirðinga með þjónustu grunnskóla eykst. Mjög ánægðum fjölgaði um 16 prósent milli ára og er nú 21%. Nú eru 72% mjög ánægð eða frekar ánægð. Ánægja með leikskóla dalar lítillega milli ára og eru nú 25% mjög ánægð í stað 29% áður.

„Breytingar taka oft á og við gerðum miklar breytingar á fyrirkomulagi leikskóladagsins. Það hefur því jafnvel áhrif hér á meðan fólk kynnist breyttum leikskóladegi,“ segir Valdimar.

Góð íþróttaaðstaða mikilvæg

Ánægja með aðstöðuna til íþróttaiðkunar í Hafnafirði mælist enn mjög há. 86% eru mjög eða frekar ánægð með hana. „Við viljum að fólk á öllum aldri eigi auðvelt með að hreyfa sig og vera með í öflugu íþrótta- og tómstundastarfi. Það hefur verið gert vel í þessum málaflokki undanfarin ár og ætlum að halda áfram á þeirri vegferð,“ segir Valdimar.

Alls eru 64% mjög eða frekar ánægð með þjónustu við eldri borgara og 60% við fatlað fólk í sveitarfélaginu. „Það er jákvætt að Hafnarfjörður mælist ofan við meðaltal í þjónustu við eldra fólk og fatlað fólk. Í þessum málaflokkum, sem og öðrum, eru tækifæri til úrbóta. Við ætlum að rýna niðurstöðurnar og sjá hvar við getum gert betur,“ segir Valdimar.

Skoðun íbúa á sorphirðunni stendur í stað milli ára, þar sem 64% eru frekar eða mjög ánægðir en 19% frekar eða mjög óánægð.

Hafnarfjarðarbær situr í 2.-3. sætis tuttugu stærstu sveitarfélaganna, rétt ofan við fjögur næstu sem skora öll það sama.

Um þjónustukönnun Gallup

Gallup gerir árlega þjónustukönnun meðal tuttugu stærstu sveitarfélaga landsins þar sem spurt er um viðhorf til þjónustu sveitarfélaganna í ýmsum málaflokkum bæði út frá reynslu og áliti.

Könnunin var gerð 17. nóvember 2025 til 13. janúar 2026.  Alls svöruðu 438 sem eru 18 ára og eldri könnuninni hér í Hafnarfiðri, lagskipt tilviljunarúrtak 18 ára og eldri úr viðhorfahópi Gallup.

Niðurstöður gefa hugmynd um ánægju íbúa með ákveðna þjónustuþætti óháð því hvort viðkomandi nýti sér þjónustuna eða ekki. Samhliða fást upplýsingar um þjónustuþætti sem gott væri að rýna betur. Niðurstöðurnar þjónustukönnunar voru birtar á fundi bæjarráðs í morgun.