Haustið er tíminn til að tengjast

Félagsmiðstöðvarnar í okkar nærsamfélagi

Stella B. Kristinsdóttir hefur umsjón með og yfirsýn yfir það faglega forvarna- og frístundastarf sem er að eiga sér stað innan grunnskóla Hafnarfjarðarbæjar í starfi sínu sem fagstjóri málaflokkanna. Hún fer víða í starfi sínu og vinnur náið með deildarstjórum frístundaheimila og félagsmiðstöðva, foreldrafélögum skólanna og Foreldraráði Hafnarfjarðar, íþróttafélagunum og öllum þeim sem koma að forvörnum, forvarnafræðslu og frístundastarfi sveitarfélagsins.

Stella var í hópi þeirra sem sátu í pallborði hugarflugsfundarins: Við erum Þorpið – framtíðin er björt ef við viljum það öll og haldinn var í nýliðinni viku í Bæjarbíó. Hér lengst til hægri.

Stella var nýverið með aðsenda grein í Fjarðarfréttum. Við birtum þessa grein einnig hér í tilefni af viku félagsmiðstöðva og ungmennahúsa 2024 sem nú stendur yfir.

Hittumst og höngsum í félagsmiðstöðvunum

Haustið er tíminn til að tengjast. Þetta er tíminn þar sem við hittum félagana eftir langt sumarfrí og tökum upp þráðinn þar sem frá var horfið. Það er einmitt svo mikilvægt að vera í sambandi við hvert annað og halda góðum tengslum. Já, plögga sig aftur í samband.

Þátttaka í skipulögðu tómstunda- og íþróttastarfi er verndandi þáttur í lífi barna og ungmenna. Það á við um íþróttastarf, félagsstarf í æskulýðsfélögum, tónlistarnám eða þátttöku í starfi félagsmiðstöðva. Mig langar að minna á valkostinn að njóta frítímans í skipulögðu félagsmiðstöðvastarfi. Við erum svo heppin að við höfum félagsmiðstöðvar í okkar nærsamfélagi! Hlutverk þeirra er að bjóða börnum og ungmennum á aldrinum 10-16 ára upp á frístundastarf sem hefur forvarnar-, uppeldis- og menntunargildi og tekur mið af aldri þeirra og þroska.

Í starfi félagsmiðstöðva leggur starfsfólk ríka áherslu á að skapa einstaka menningu og öruggt umhverfi með börnum og ungmennum. Þátttaka í skipulögðu starfi félagsmiðstöðva og ungmennahúsa með fagfólki hefur mikilvægt forvarnargildi og eykur líkur á því að ungt fólk kjósi heilbrigðan lífsstíl og forðist áhættuhegðun. Þar er boðið upp á afþreyingaraðstöðu og samveru jafnaldra í bland við viðburði, stóra sem smáa. Áhersla er lögð á að virkja börn og ungmenni til þátttöku í starfinu og er dagskrá fjölbreytt og unnin með ungmennum. Félagsmiðstöðvar sinna einnig vettvangsstarfi bæði í sínu nærumhverfi og svo sameiginlega í starfi Götuvitans sem er flakkandi félagsmiðstöð.

Götuvitinn sinnir vettvangsstarfi eftir lögbundinn útivistartíma í samstarfi við foreldrafélög en er einnig kominn í samstarf við önnur sveitarfélög á stórhöfuðborgarsvæðinu. Öll eru velkomin í félagsmiðstöðina og hvet ég aðstandendur til að kanna dagskrána í félagsmiðstöðinni með barninu, kíkja með þeim þangað eða hvetja þau til nýta sér hana til að hittast og hangsa. Félagsmiðstöðvar eru opnar í öllum skólum mánudaga, miðvikudaga og föstu­daga seinni part dags og fram á kvöld, einnig er HHH hinsegin félagsmiðstöðin opin á fimmtudögum og Músík og mótor alla virka daga 17-22.

Kynnið ykkur starf félagsmiðstöðvanna

Takk Stella og allt þitt góða fólk!

Við erum þorpið: Framtíðin er björt ef við viljum það öll 

Kynnið ykkur starf félagsmiðstöðvanna

Félagsmiðstöðva- og ungmennahúsavikan 2024 stendur yfir dagana 14. – 18. október. Foreldrar, forsjáraðilar, systkini og önnur áhugasöm eru hvött til að kynna sér starfsemi félagsmiðstöðva og ungmennahúsa í Hafnarfirði og hvetja börn sín og ungmenni til virkrar þátttöku.