Jarðskjálftar: Krjúpa, skýla, halda

Mikilvægt að halda ró sinni og hlusta á ráðleggingar almannavarna

Nokkuð sterk jarðskjálftahrina hefur gengið yfir á Reykjanesi síðustu daga og viku.  Af því tilefni er almenningur hvattur til þess að kynna sér varnir og viðbúnað vegna jarðskjálfta þannig að sem flestir og helst allir séu meðvitaðir um rétt viðbrögð. Ríkislögreglustjóri, í samráði við lögreglustjórann á höfuðborgarsvæðinu, lögreglustjórann á Suðurnesjum og Veðurstofu Íslands, lýstu í síðustu viku yfir hættustigi almannavarna vegna jarðskjálftahrinunnar og er það gert til að samhæfa aðgerðir og verklag ýmissa verklagsaðila og stofnana og hefur ekki áhrif á almenning.  Áhersla er lögð á að undirbúa fólk undir það sem mögulega gæti gerst.   

Krjúpa, skýla og halda er orðaröð sem allir ættu að leggja á minnið. 

Ítarlegar upplýsingar um viðbrögð við og eftir jarðskjálfta er að finna á vef almannavarnadeildar ríkislögreglustjóra ásamt upplýsingum um varnir og viðbúnað vegna skjálfta. 

• Vefur almannavarnadeildar ríkislögreglustjóra
• Viðbrögð við skjálfta
• Viðbrögð eftir skjálfta
• Varnir og viðbúnaður
• Vefur Veðurstofunnar – nýjustu upplýsingar um stöðu mála

Mikilvæg atriði sem mikilvægt er að skoða – heima og á vinnustað 

Húsgögn:
Festið skápa, hillur og þunga muni í gólf eða vegg. Hafið hjól sem eru á húsgögnum alltaf í læstri stöðu. Ef engin læsing er á hjólunum, setjið þá ramma utan um hjólin til að koma í veg fyrir að húsgögnin fari af stað í jarðskjálfta. Munið hins vegar að rammi eða læsing á hjólum kemur ekki í veg fyrir að húsgögn velti. Festið létta skrautmuni með kennaratyggjó.

Lausir munir og skrautmunir:
Stillið þungum munum ekki ofarlega í hillur eða á veggi án þess að festa þá tryggilega. Hægt er að nota kennaratyggjó til að tryggja að léttari munir færist ekki úr stað við jarðskjálfta. Þungur borðbúnaður og hlutir eru best geymdir í neðri skápum, helst lokuðum.

Kynditæki og ofnar:
Festið kynditæki og ofna. Kynnið ykkur staðsetningu og lokun á vatnsinntaki og rafmagnstöflu. Festið hitaveituofna tryggilega. Leki getur valdið miklu tjóni ef ekki er lokað strax fyrir vatnið. Sama gildir um frágang á þvottavélum og uppþvottavélum.

Myndir, ljósakrónur:
Festið myndir og ljósakrónur í lokaðar lykkjur.

Skápahurðir:
Geymið þungan borðbúnað í neðri skápum / skúffum og setjið öryggislæsingar / barnalæsingar á skápahurðir til varnar að innihald þeirra falli út úr þeim.

Svefnstaðir:
Fyrirbyggið að skápar, málverk, brothættir og þungir munir geti fallið á svefnstaði. Varist að hafa rúm við stóra glugga og hlaðna milliveggi.

Loft og gólf:
Gangið vel frá niðurhengdum loftum og upphækkuðum gólfum.

Rúður:
Byrgið fyrir glugga eða setjið öryggisfilmu á rúður til að koma í veg fyrir skæðadrífu glerbrota ef rúða brotnar. Látið rúm ekki standa undir gluggum ef hætta er á jarðskjálftum.

Tryggingar:
Bætur Náttúruhamfaratryggingar Íslands á fasteignum eru miðaðar við brunatryggingar, sem eru skyldutryggingar.

Útvarp og tilkynningar:
Hlustið á tilkynningar og fyrirmæli sem gefin eru í útvarpi. Gott er að hafa útvarp með langbylgju ef FM sendar detta út. Þá er hægt að hlusta á útvarp í bílum.

Símar:
Farsímar duga skammt ef rafmagn dettur út í lengri tíma. Þá getur verið gott að eiga hleðslutæki til að hafa í bifreið eða hleðslubanka til að hlaða farsíma. Sendu SMS til þinna nánustu í stað þess að hringja (sérstaklega eftir stóran jarðskjálfta) til að minnka álag á símkerfi í hamförum.