LÆK á leiðinni: Vika í stærsta útgáfupartý landsins

LÆK kemur út og bræðurnir í VÆB skemmta

Aðeins vika er í stærsta partý sem haldið hefur verið vegna útgáfu bókar hér á landi. Bókin LÆK eftir rithöfundana Bergrúnu Írisi Sævarsdóttur og Gunnar Helgason samanstendur af 18 smásögum sem byggðar eru á tillögum frá hátt í 2.600 nemendum úr grunnskólum Hafnarfjarðar.

Bergrún og Gunni mæta í útgáfuhófið og spjalla um bókina, bræðurnir í VÆB mæta og bókakassar verða afhentir skólastjórnendum og formönnum nemendaráða skólanna. Það verður stuð. Miðstigið mætir kl. 9 og unglingastigið 10.15 á Thorsplan.

Foreldrar fá bréf frá skólanum um bókina

Foreldrar fá þessa dagana bréf frá skólunum um markmið bókaútgáfunnar en LÆK er samstarfsverkefni milli Mennta- og lýðheilsusviðs Hafnarfjarðar og rithöfundanna. Bókinni er ætlað að efla lesskilning, orðaforða, læsi og lestraráhuga nemenda á mið- og unglingastigi í grunnskólum Hafnarfjarðar, á öllum getustigum. Smásögurnar tengjast hverjum skóla og voru tvær sögur samdar í hverjum þeirra.

Við útgáfu á LÆK var áherslan sett á vandaða uppsetningu texta, góða leturgerð og leturstærð sem hentar nemendum í lestrarvanda. Bókin kemur samtímis út sem hljóðbók hjá Hljóðbókasafninu. Auk smásagnanna er stutt umfjöllun í bókinni ætluð foreldrum og kennurum um hvernig dýpka má lesskilning nemenda.

Öll á Thorsplan síðasta vetrardag

Útgáfuhófið stóra verður síðasta vetrardag, 24. apríl, á Thorsplani í Hafnarfirði. Börnin fá bókina afhenta þann dag og verður unnið með hana í öllum skólum Hafnarfjarðar í maí. Bókin er þó ekki aðeins fyrir Hafnfirðinga heldur mun einnig fást í bókaverslunum. En verður bókin örugglega lesin?

„Já, ég efast ekki um það, því núna fer keppni í gang,“ segir Gunni Helga. „Veitt verða verðlaun fyrir áhugaverðustu söguna á unglinga- og miðstigi og öll verða að kjósa uppáhalds söguna sína. Bannað að kjósa sinn skóla. Þannig að það kemur í ljós í lok maí hvaða skóli fær verðlaunin. Skólaheiðurinn er að veði.“

Útgáfuhófið: Síðasta vetrardag, 24. apríl, verður stærsta útgáfuhóf landsins þar sem útgáfu á LÆK bókinni verður fagnað á Thorsplani.

• Kl. 9:00 mæta allir nemendur af miðstigi
• Kl. 10:15 mæta allir nemendur af unglingastigi
• Kl. 14:00 – 16:00:  Bókasafn Hafnarfjarðar – Bergrún Íris og Gunni Helga taka á móti nemendum á bókasafninu og árita bækurnar fyrir þá sem vilja.