Með puttana á Skólapúlsinum

Aukin ánægja í grunnskólastarfi
bæjarins
Úrbótaverkefni skólanna
eru að skila sýnilegum og jákvæðum árangri

Niðurstöður Skólapúlsins voru kynntar á fundi fræðsluráðs
Hafnarfjarðar í vikunni og þykja þær sérstaklega ánægjulegar fyrir hafnfirskt grunnskólasamfélag.
Tilgangur Skólapúlsins og Skólavogar, sérstakrar skýrslu sem Hafnarfjarðarbær
gefur út með niðurstöðunum, er að átta sig á stöðu mála og gefa einstaka skólum,
og sveitarfélaginu í heild sinni, möguleika til að finna tækifæri, áskoranir og
viðfangsefni til skólaþróunar ásamt því að kortleggja það sem vel er gert
og/eða betur má fara. Niðurstöðurnar hafa verið nýttar til að móta
úrbótaverkefni, bæði innan einstakra skóla og verkefni sem snúa að breytingum
heilt yfir og þar á meðal bættu starfsumhverfi starfsfólks og nemenda.

Miklar og jákvæðar
breytingar

Mikil aukning er á ánægju með matarþjónustu í grunnskólum
Hafnarfjarðar samkvæmt sjónarmiðum foreldra. Á sama tíma og skráningar nemenda
í mat hafa aukist, og eru enn að aukast, þá virðist þjónustan hafa tekið miklum
jákvæðum breytingum á skólaárinu 2018-2019 miðað við fyrri mælingu og er ánægjan
mun meiri en meðaltal landsins í Skólavoginni. Sömuleiðis eru foreldrar ánægðir
með vinnu grunnskóla Hafnarfjarðar í eineltismálum og er bærinn þar undir
meðaltali á landsvísu eða í sjötta sæti af þeim sveitarfélögunum sem taka þátt
í Skólavoginni. „Það er afar ánægjulegt
að sjá það svart á hvítu að þau úrbótaverkefni sem fræðsluráð og starfsfólk sveitarfélagsins, innan skóla og stoðsviða, eru að innleiða séu að
skila sér beint til nemenda, foreldra og starfsfólks í formi aukinnar ánægju
með starfsumhverfi og þjónustu og ánægjulegast í þessu öllu saman er trú
nemenda á eigin getu og virkni. Þegar uppi
er staðið þá er það líðan þeirra sem skiptir mestu máli og að hver og einn
nemandi sé að vaxa, þroskast og eflast á eigin forsendum. Það eitt veit á gott
og er mikilvægt fóður í þá vinnu sem nú er að eiga sér stað við mótun á nýrri
menntastefnu fyrir Hafnarfjarðarbæ sem mun líta dagsins ljós næsta vor“ segir
Fanney D. Halldórsdóttir, sviðsstjóri mennta- og lýðheilsusviðs
Hafnarfjarðarbæjar.

Nemendur ánægðir með
virkni sína og hafa trú á eigin getu

Samkvæmt niðurstöðum Skólapúlsins þá upplifa nemendur í 6. –
10. bekk virkni sína jákvætt og nær virknin til seiglu þeirra í námi, trú á
eigin getu og vinnubrögðum og stærðfræðiáhuga. Hafnarfjarðarbær er hér í hópi þeirra
25% efstu meðal þátttökusveitarfélaga eða í 5. sæti af 33 sveitarfélögum. Niðurstöður
einstaka skóla eru að koma misjafnt út eftir efnisþáttum og endurspegla að
miklu leyti áherslur og menningu einstaka skóla og áhrif starfsfólks á
skólabraginn í samspili við nemendur.

Skýrsluna Skólavogin 2018-2019 má að finna hér

Um Skólapúls og
Skólavog

Skólapúlsinn mælir viðhorf nemenda til skólastarfsins í
grunnskólunum árlega og foreldra og starfsmanna í grunnskólum annað hvert ár. Hafnarfjarðarbær
hefur verið þátttakandi í Skólapúlsinum í sex ár þannig að allir skólar
bæjarins eru í þátttakendur í sömu könnunum á sama tíma og þannig fæst ákveðin
saga og samanburður milli ára og tímabila. Eftir að niðurstöður úr Skólapúlsi
liggja fyrir gefur sveitarfélagið út skýrslu, Skólavogina, um niðurstöðurnar fyrir
Hafnarfjörð. Þessi skýrslugerð er hluti lagalegrar skyldu bæjarins um að
viðhafa ytra mat á skólastarfi sveitarfélagsins í samræmi við lög um grunnskóla
nr. 91/2008. Tilgangur þessa alls er að safna áreiðanlegum gögnum um skólastarfið
til að átta sig á hvar áskoranir og tækifæri til skólaþróunar liggja.