Mikilvægur vettvangur fyrir börn og ungmenni

Gleðilega félagsmiðstöðva- og ungmennahúsaviku 2023

Félagsmiðstöðva- og ungmennahúsavikan 2023 er haldin hátíðleg dagana 16.-20. október. Vikan er árleg og haldin á öllu landinu fyrir tilstilli Samfés, samtaka félagsmiðstöðva og ungmennahúsa, á Íslandi. Vikan hefur það markmið að varpa ljósi á mikilvægi og virði þessa vettvangs fyrir börn og ungmenni. Foreldrar, forsjáraðilar, systkini og önnur eru hvött til að kynna sér starfsemi félagsmiðstöðva og ungmennahúsa í Hafnarfirði og hvetja börn sín og ungmenni til virkrar þátttöku. Fjölmargar félagsmiðstöðvar munu í vikunni standa fyrir opnu húsi, vöfflukaffi og bjóða í heimsókn.

Þátttaka í skipulögðu frístundastarfi er mikilvæg forvörn

Sýnt hefur verið fram á að þátttaka í skipulögðu íþrótta og tómstundastarfi skiptir miklu máli fyrir framtíð barna og ungmenna, það hefur verið talin einn af stærri verndandi þáttum í þeirra lífi. Þau ungmenni sem taka þátt í skipulögðu starfi eru ólíklegri en önnur börn til að nota áfengi, tóbak og vímuefni. Það skiptir ekki máli hvort um ræðir íþróttir, dans, tónlist, skátastarf eða félagsmiðstöðvastarf.

Frístundastarf sem tekur mið af aldri og þroska

Hlutverk félagsmiðstöðva er að bjóða börnum og unglingum á aldrinum 10-16 ára upp á frístundastarf sem hefur forvarnar-, uppeldis- og menntunargildi og tekur mið af aldri þeirra og þroska. Það er mikilvægt að bjóða upp á aðstöðu til afþreyingar og samveru með jafnöldrum í öruggu umhverfi. Áhersla er lögð á að virkja börn og unglinga til virkrar þátttöku og framkvæmda í starfinu. Félagsmiðstöðvarstarfið er fjölbreytt og er dagskrá unnin með ungmennum sjálfum. Félagsmiðstöðvarnar standa einnig fyrir stærri viðburðum eins og grunnskólahátíð, söngvakeppni, skólaskate, Hafnarfjarðarstíl og spurningarkeppninni Veistu svarið svo eitthvað sé nefnt. Einnig taka þær þátt í stærri viðburðum á landsvísu eins og Söngvakeppni Samfés, Samfestingnum og Rímnaflæði. Starfsfólk félagsmiðstöðvanna reynir að hvetja börn og ungmenni að hlusta eftir, finna og efla styrkleika sína og áhugasvið enda meiri líkur á því að einstaklingurinn blómstri þegar hann finnur ástund og áhugamál við hæfi. Eitt af því sem félagsmiðstöðvar leggja mikinn metnað í er þátttaka unga fólksins og eru þau höfð, eftir fremsta megni, með í ráðum og hvött til lýðræðislegrar þátttöku.

Félagsmiðstöðvar í öllum hverfum við alla grunnskóla

Félagsmiðstöð er starfrækt í öllum hverfum við alla níu grunnskóla sveitarfélagsins. HHH – Hinsegin hittingar í Hafnarfirði er nýjasta viðbótin og eru opnanir alla fimmtudaga í félagsmiðstöðinni við Víðistaðaskóla. Frístundaklúbbarnir Kletturinn og Vinaskjól í Húsinu Suðurgötu 14 bjóða upp á fjölbreytt tómstundastarf fyrir börn og ungmenni með fötlun. Í Hafnarfirði eru einnig starfrækt tvö ungmennahús eða ungmennahús og sérhæfð félagsmiðstöð. Annarsvegar Hamarinn á Suðurgötu með starfsemi fyrir 16 – 25 ára og hinsvegar Músík og Mótor á Dalshrauni með starfsemi fyrir 13 – 25 ára.

• Upplýsingar um félagsmiðstöðvar grunnskólanna
• Yfirlit yfir félagsmiðstöðvarnar í grunnskólunum
• Hamarinn ungmennahús
• Músík og mótor sérhæfð félagsmiðstöð 
• HHH – Hinsegin félagsmiðstöðin

Félagsmiðstöðvarnar sinna einnig leitarstarfi

Félagsmiðstöðvar sinna einnig leitarstarfi en sá þáttur starfseminnar miðar að því að finna og vinna með börn og ungmenni sem teljast til áhættuhóps af einhverjum ástæðum eða þurfa á aðstoð að halda. Þannig vinnur starfsfólk markvisst hópastarf með einstaklingum sem það þurfa en rannsóknir sýna að vel skipulagt og faglega unnið hópastarf skilar miklum árangri í líðan barna og ungmenna. Í Hafnarfirði er útideild sem vinnur í samstarfi við félagsmiðstöðvar og foreldrafélög sem heitir Götuvitinn.

HHH- Hinsegin hittingar í Hafnarfirði

HHH er opinn alla fimmtudaga frá kl. 19:30-22 fyrir nemendur í 8.-10. bekk og annan hvern fimmtudag frá kl. 17-19 fyrir nemendur í 5.-7. bekk. Markmið starfsins er að ungmennin upplifi sig örugg, velkomin og fái tækifæri til að blómstra í sínu. Starfið byggir að stórum hluta á jafningja­fræðslu og fá ungmennin meðal annars það verkefni að vekja athygli á málefn­um hinsegin ungmenna og fanga fjölbreytileikanum í Hafnarfirði. Í tilefni vikunnar verður opið hús fyrir foreldra, forsjáraðila, systkini, ættingja og öll sem vilja koma og kynna sér starfið. Opið hús verður frá kl. 17:30-20:30, fimmtudaginn 19. október.

Ungmennahúsin sinna félagsstarfi fyrir eldri ungmenni

Þegar hafnfirsk ungmenni komast á framhaldsskólaaldur þá tekur við Ungmennahúsið Hamarinn sem staðsett er að Suðurgötu 14 og er opið frá kl. 9-23 alla virka daga. Þar eiga ungmenni í Hafnarfirði öruggt rými þar sem þau stýra verkefnum og dagskrá í samráði við starfsfólk. Í Hamrinum er aðstaða til að læra, njóta, fara í pool eða fá ráðgjöf frá Berginu Headspace og Samtökunum 78. Þar er skipulagt starf í kringum spunaspil, handavinnu, útivist og fleira. Annan hvern þriðjudag er Hinsegin Hamarinn en þá hittast ungmenni sem skilgreina sig hinsegin og eiga notalega kvöldstund saman. Hægt er að finna Hamarinn á Facebook og Instagram til að fylgjast með starfinu þar og öllu því sem í boði er á þeirra vegum.

Músik og mótor er sérhæfð félagsmiðstöð sem staðsett er í gömlu lakkrísgerðinni að Dalshrauni 10. Þar er hægt að fá herbergi til afnota til að sinna allskonar listsköpun eins og fyrir hljómsveitir að æfa, myndlistarfólk að skapa eða hvað sem er sem krefst pláss. Einnig er þar stór bílskúr þar sem hægt er að finna tól og tæki til að taka í sundur mótorhjól, bíla og í raun hvað sem er og setja aftur saman. Músik og mótor er opið alla virka daga frá kl. 15 – 22. Músik og mótor er líka á Facebook og Instagram.

Kynnið ykkur starf félagsmiðstöðvanna

Hafnarfjarðarbær er stoltur af því öfluga starfi sem á sér stað í félagsmiðstöðvum og ungmennahúsum bæjarins! Aðstandendur eru hvattir til að kynna sér starf félagsmiðstöðvanna og börn og ungmenni til að nýta sér þjónustuna.