Ný slökkvistöð á Völlunum komin á áætlun

Slökkvistöð rís á Völlunum

Slökkvistöð á Völlunum í Hafnarfirði er komin á brunavarnaáætlun Slökkviliðs höfuðborgarsvæðisins, SHS. Stefnt er að því að hún rýsi á næstu tíu árum. Áætlunin var undirrituð í Skógarhlíð fyrir helgi.

„Við erum að taka næsta skref í að bæta viðbragð og þjónustu með því að setja slökkvistöð á Völlunum í brunavarnaáætlun SHS. Þetta er markviss fjárfesting í öryggi íbúa Hafnarfjarðar,“ segir Valdimar Víðisson bæjarstjóri. Hann ritaði undir áætlunina fyrir Hafnarfjarðarbæ og vonar að stöðin komist sem fyrst upp.

Áætlunin sem undirrituð var nú tekur við af eldri áætlun sem var í gildi til 31. október í ár, sú nýja gildir í fimm ár. Hún er samþykkt af Húsnæðis- og mannvirkjastofnun (HMS) og sveitarfélögum á starfssvæði slökkviliðsins.

Markmiðið er fullbúið slökkvilið

Markmið brunavarnaáætlunar er samkvæmt lögum um brunavarnir að tryggja að slökkvilið sé mannað, skipulagt, útbúið tækjum, menntað og þjálfað til að ráða við þau verkefni sem því er falið. Áætlunin byggir á áhættumati starfssvæðisins, sem ræður stærð og skipulagi slökkviliðsins og er grundvöllur að forgangsröðun aðgerða og fjármagns og eykur öryggi íbúa svæðisins.

Heiða Björg Hilmisdóttir, borgarstjóri og formaður stjórnar SHS, segir  höfuðborgarsvæðið hafa vaxið hratt undanfarin ár og samkvæmt spám muni sá vöxtur halda áfram. „Mikil fólksfjölgun, þróun byggðar og uppbygging á svæðinu hefur haft áhrif á starfsemi SHS. Má þar meðal annars nefna aukið álag og lengri viðbragðstíma.“ Liður í því að bæta viðbragð sé bygging nýrrar slökkvistöðvar í Tónahvarfi í Kópavogi sem komist í gagnið innan fimm ára og stöðin á Völlunum í Hafnarfirði á næstu 10 árum.

Hermann Jónasson, forstjóri HMS, segir brunavarnaáætlun öllum slökkviliðum mikilvægt stjórntæki í þeirra lögbundnu verkefnum í brunavörnum. „Verkefni Slökkviliðs höfuðborgarsvæðisins eru fjölbreytt þar sem slökkviliðið er það stærsta á landinu og starfssvæðið er bæði þéttbýlt og víðfemt. Í þessari áætlun er farið ítarlega yfir hvernig uppbygging hjá liðinu þarf að vera á næstu árum til að geta tekist á við þær áskoranir sem það stendur frammi fyrir,“ segir hann.

Spennandi tímar framundan

Jón Viðar Matthíasson slökkviliðsstjóri SHS kveðst fagna útkomu nýju brunavarnaáætlunarinnar og segir spennandi tíma framundan hjá SHS í uppbyggingu slökkviliðsins.

„Ný áætlun gerir okkur enn betur kleift að sinna okkar lögbundnu verkefnum áfram vel, ásamt öðrum sem okkur er falið að leysa,“ segir Jón Viðar.

Myndatexti: Áætlunin var undirrituð af stjórn SHS sem er skipuð Heiðu Björgu Hilmisdóttur borgarstjóra Reykjavíkur, Ásdísi Kristjánsdóttur bæjarstjóra Kópavogs, Valdimari Víðissyni bæjarstjóra Hafnarfjarðar, Almari Guðmundssyni bæjarstjóra Garðabæjar, Regínu Ásvaldsdóttur bæjarstjóra Mosfellsbæjar og Þór Sigurgeirssyni bæjarstjóra Seltjarnarness. Einnig undirritaði Þorbjörg Gísladóttir sveitarstjóri áætlunina fyrir hönd Kjósarhrepps, sem og Hermann Jónasson forstjóri HMS og Jón Viðar Matthíasson slökkviliðsstjóri SHS.