Opinberi vefur ársins 2016

Síðastliðinn föstudag voru Íslensku vefverðlaunin fyrir árið 2016 veitt við hátíðlega athöfn í Silfurbergi Hörpunnar. Vefur Hafnarfjarðarbæjar – hafnarfjordur.is – fékk verðlaun sem besti opinberi vefur ársins 2016. Íslensku vefverðlaunin eru uppskeruhátíð vefiðnaðarins, haldin með það að markmiði að efla hann, verðlauna bestu vefina og hvetja þá sem starfa á þessum vettvangi til dáða. 

Vefur Sinfóníuhljómsveitar Íslands var valinn Vefur ársins 2016 af Íslensku Vefverðlaununum. Auk vef Sinfóníuhljómsveitarinnar sigraði Sjóvá í flokki stærri fyrirtækja og Tix.is fékk verðlaun fyrir bestu vefverslunina og fitsuccess.is í flokki vefkerfa. Í tilkynningu frá aðstandendum verðlaunahátíðarinnar segir að mikil gróska sé í vefiðnaðinum og það megi best sjá hve vel unnir og vandaðir vefir eru sem framleiddir eru á Íslandi í dag.

Opinberi vefur ársins: hafnarfjordur.is

Hafnarfjarðarbær setti nýjan vef í loftið í upphafi árs 2016 og hefur síðan þá mótað vefinn og þróað enn frekar með virkri aðstoð íbúa, starfsmanna og annarra hagsmunahópa.  Mikill undirbúningur átti sér stað áður en nýr vefur var settur í loftið með aðkomu fjölmargra aðila og því óhætt að segja að þessi viðurkenning séu verðlaun til allra þeirra sem komu að vinnunni með einum eða öðrum hætti. Vefurinn er hannaður og þróaður í nánu samstarfi við Hugsmiðjuna og Fúnksjón vefráðgjöf. 

“Ég er yfir mig ánægður og stoltur af árangrinum, þetta er mikil viðurkenning fyrir okkur. Það er hægara sagt en gert að endurskipuleggja og þróa notendavænan vef hjá stóru sveitarfélagi sem hentar öllum hagsmunahópum. Við tókum mikið af efni í burtu, lögðum ríka áherslu á öfluga leitarvél og ritstýrða leit og einfölduðum leiðarkerfi notandans um vefinn til muna. Þetta hefði ekki verið hægt nema með innleggi og athugasemdum allra hlutaðeigandi aðila.  Hér spiluðu starfsmenn og íbúar Hafnarfjarðarbæjar stórt hlutverk. Viðurkenningin er okkur hvatning til áframhaldandi afreka á þessu sviði sem og öðrum” segir Garðar Rafn Eyjólfsson kerfisfræðingur og vefstjóri Hafnarfjarðarbæjar. 

Í umsögn dómnefndar um nýjan vef Hafnarfjarðarbæjar segir að hlutverk opinberra vefja sé að veita upplýsingar og þjónustu. Það er mat dómnefndar að virkilega vel hafi tekist til með vef Hafnarfjarðarbæjar. Hann sé einfaldur og auðveldur í notkun, vel upp byggður og leiðarkerfið skýrt.  Aðaláherslan er lögð á að mæta þörfum markhópsins þar sem helstu aðgerðir eru dregnar fram og öflug leit sett í forgrunn.

Um SVEF

Samtök vefiðnaðarins ( SVEF ) eru fagsamtök þeirra er starfa að vefmálum á Íslandi. Samtökin hafa það að markmiði að miðla þekkingu og efla fagleg vinnubrögð í greininni, vera samræðuvettvangur félagsmanna og andlit stéttarinnar út á við. SVEF sér árlega um framkvæmd Vefverðlaunanna, en fyrsta verðlaunaafhendingin var haldin árið 2000. Félagið stendur árlega fyrir ráðstefnunni IceWeb, sem er metnaðarfull alþjóðleg ráðstefna um vefmál, auk fjölda smærri fyrirlestra, umræðufunda og mannfagnaða fyrir félagsmenn.

^{Ljósmyndari: Grunnar Freyr Steinsson}