Samræmd greining – vefgátt Almannavarna

Samræmd greining á áhættu og áfallaþoli – Vefgátt Almannavarna

Til þess að einfalda vinnu sveitarfélaga við að greina og
leysa þær krísur sem upp koma á Íslandi hafa Almannavarnir útbúið
vefgátt þar sem haldið er utan um samræmda greiningu í hverju
sveitafélagi. Í vefgáttinni er hægt að nálgast leiðbeiningar almannavarna fyrir
greiningu á áhættu og áfallaþoli. Leiðbeiningarnar eru gerðar til að
einfalda vinnu sveitarfélaga og ekki síst að hjálpa til við að greina og draga
fram þá vá og/eða verkefni sem upp geta komið.

Við erum öll almannavarnir 

Á síðustu vikum hafa Almannavarnir kynnt
þetta verkefni með ýmsum hætti. M.a. var haldið málþing fyrir ráðuneytin og í
kjölfarið á því samráð við þau um leiðbeiningar og skjöl sem þau varða. Einnig
hafa verið haldnir kynningarfundir fyrir ráðgjafa og leiðbeinendur sem kenna á
námskeiðum sem tengjast verkefninu. Í lok apríl var svo haldin ráðstefnan „Við
erum öll almannavarnir“.

Mælaborð með yfirliti yfir niðurstöður  

Í vefgáttinni er einnig hægt að nálgast mælaborð með
yfirliti yfir niðurstöður sem hægt er að fylgjast með. Þar geta t.d. íbúar
hvers sveitarfélags fyrir sig séð hver staðan er í sínu sveitarfélagi. Vefgáttin
er búin að vera í virk í nokkrar vikur og nú þegar hafa mörg sveitarfélög nýtt
þennan sameiginlega vettvang. Vefgáttin gefur ekki bara notendum
auðveldan aðgang að greina áhættu og áfallaþoli á sínum stað heldur gefur
gáttin Almannavörnum einnig tækifæri að fá yfirsýn yfir stöðu áhættugreininga
hjá öllum þeim sem þurfa að gera þær. Sveitarfélög gegna aðalhlutverki í
vinnu við að tryggja öryggi borgara og viðbúnað. Þau fara með almannavarnir í
héraði sem gerir kröfu til þess að sveitarfélag vinni heildstætt og
kerfisbundið að því að tryggja öryggi borgaranna og viðbúnað. Þetta
undirstrikar hið mikilvæga hlutverk sem sveitarfélag hefur sem samræmingaraðili
og drifkraftur í almannavarnastarfi.

Stefnuverkefni um könnun á áfallaþoli 

Verkefnið á upptök sín í
stefnuverkefni um könnun á áfallaþoli ráðuneyta, ríkisstofnana og sveitafélaga
sem aftur tengist stefnu stjórnvalda í almannavarna- og öryggismálum en
þar er eitt áhersluatriði greining á áhættu og áfallaþoli hjá framangreindum
aðilum. Vinnan við vefgáttina hefur staðið yfir á annað ár. Sú sem
hefur leitt vinnuna fyrir hönd Almannavarna er Elísabet Pálmadóttir
verkefnastjóri, henni til aðstoðar var Hjördís Guðmundsdóttir, samskiptastjóri
Almannavarna sem hefur haldið utan um kynningu á verkefninu gagnvart
hagsmunaaðilum og haldið utan um vinnu Hvíta hússins sem hefur séð um
útlitshönnunina: Þá var það Magga Dóra Ragnarsdóttir hjá Mennsk sem hélt utan
um starf ráðgjafanna sem sáu um vefhönnun í verkefninu sem voru auk Mennsk,
Ozio og Metadata.

Frétt
á vef Almannavarna.