Sigurvegarar í Stóru upplestrarkeppninni 2024

Rækta íslenskuna í Stóru upplestrarkeppninni

Auðunn Sölvi Hugason, Setbergsskóla, sigraði í Stóru upplestarkeppninni 2024 sem haldin var í Víðistaðakirkju sídegis í gær. Axel Høj Madsson, Áslandsskóla, var í öðru sæti og Gerður Lind Pálmadóttir, Lækjarskóla, í því þriðja. Átján nemendurnir tóku við viðurkenningu úr hendi Guðna Th. Jóhannessyni, forseta Íslands.

„Ég vil þakka krökkunum fyrir sitt frábæra framlag. Þau stóðu sig, eins og þið vitið sem hér hlýdduð á, alveg frábærlega,“ sagði forsetinn við athöfnina. „Framtíðin er björt með kynslóð af þessu tagi.“

Já, vandaður, fallegur upplestur ómaði um Víðistaðakirkju þegar átján nemendur úr 7. bekkjum grunnskóla Hafnarfjarðar tóku þátt í Stóru upplestrarkeppninni 2024. Nemendurnir fluttu brot úr skáldverkinu Hetja, eftir Björk Jakobsdóttur og ljóð úr bókinni 2. umferð eftir skáld keppninnar, Braga Valdimar Skúlason. Þau Björk og Bragi Valdimar voru í salnum og hlýddu einnig á upplesturinn.

Þið eruð öll sigurvegarar

Rósa Guðbjartsdóttir bæjarstjóri hvatti þau einnig áfram og hrósaði fyrir þeim fyrir lesturinn. „Þið eruð öll sigurvegarar sem eruð hér komin sem fulltrúar ykkar skóla,“ sagði hún. „Þið eigið eftir að komast að því með aldri og árum hvað það er mikilvægt að geta komið fram, talað við fólk í litlum og stórum hópum. Komið hugsunum sínum og skoðunum á framfæri. Bæði í ræðu og riti.“

Dómnefnd valdi sigurvegarana úr flottum hópi fulltrúa sinna skóla og veitti þeim sérstaka viðurkenningu. Dómnefndina í ár skipuðu Björk Einisdóttir formaður, Anna Þorbjörg Ingólfsdóttir, Árni Sverrir Bjarnason og Vilhjálmur B. Bragason. Kynnir og stjórnandi hátíðarinnar var Ingibjörg Einarsdóttir. Reynir Örn Sigrúnarson sem varð i 3. sæti í fyrra kynnti ljóðskáld keppninnar og Karen Hrönn Guðjónsdóttir, sigurvegari keppninnar 2023 kynnti skáldið. Rósa Guðbjartsdóttir hélt ávarp.

Nemendur í 4. bekk og þátttakendur í Litlu upplestrarkeppninni 2023 stigu fram sem talkór. Kórinn er eitt af einkennum Litlu upplestrarkeppninnar sem er sprotaverkefni út frá Stóru upplestrarkeppninni. Hún er ætluð nemendum í 4. bekkjum grunnskólanna og hefur sama undirliggjandi markmið og tilgang en öðruvísi nálgun og sú stóra. Þá las Antonella De Las Nieves Lopez las ljóð á spænsku.

Axel, Rósa bæjarstjóri, Gerður og Auðunn eftir góða uppskeru í Víðistaðakirkju.

Viðurkenningar fyrir smásögur

Á hátíðinni voru viðurkenningar veittar fyrir smásagnasamkeppni 8. – 10. bekkjar og í samkeppni um verðlaunamynd á boðskort lokahátíðarinnar.

Birta Jóhannsdóttir í 8. Bekk í Öldutúnsskóla sigraði í smásagnasamkeppni. Í öðru sæti Arnheiður Ísleif Ólafsdóttir í 9. bekk í Áslandsskóla og  Sunna Björk Magnúsdóttir nemandi í 9. bekk í Víðistaðaskóla var svo í því þriðja, rétt eins og í fyrra.

Hildur Andrésdóttir úr 6. bekk Lækjarskóla hlaut viðurkenningu fyrir hönnun boðskorts keppninnar.

Fanney Dóróthe, sviðsstjóri mennta- og lýðheilsusviðs, Hildur Andrésdóttir og Guðbjörg Dögg skólastjóri Lækjarskóla.

Hófst sem tilraunaverkefni fyrir 28 árum

Stóra upplestrarkeppnin hófst sem tilraunaverkefni um upplestur í Hafnarfirði veturinn 1996-1997. Síðan hefur keppnin stækkað og eflst svo um munar. Hún hefur um árabil einnig verið haldin á landsvísu.

Raddir, samtök um vandaðan upplestur og framsögn, héldu utan um keppnina til 25 ára en síðustu þrjú árin hafa sveitarfélögin og skólasamfélagið á hverjum stað staðið að keppninni. Í Hafnarfirði nýtur skólasamfélagið enn góðs af faglegri aðstoð Ingibjargar Einarsdóttur, upphafsaðila Stóru upplestrarkeppninnar á Íslandi, sem á enn veg og vanda að lokahátíðinni í Víðistaðakirkju.

„Ég vil þakka Ingibjörgu sérstaklega, sem við köllum móður upplestrarkeppninnar,“ sagði bæjarstjórinn við þetta tækifæri.

Keppendur í ár:

Gerður Lind Pálmadóttir, Lækjarskóla

Arnar Logason, Skarðshlíðarskóla

Guðrún Telma Steindórsdóttir, Hraunvallaskóla

Aðalheiður V. Ragnarsdóttir, Engidalsskóla

Elma Kolbrún Bjarnadóttir, Víðistaðaskóla

Axel Høj Madsson, Áslandsskóla

Andrea Laxdal, Hvaleyrarskóla

Klara Lýðsdóttir, Öldutúnsskóla

Auðunn Sölvi Hugason, Setbergsskóla

Lena Guðrún Birkisdóttir, Hvaleyrarskóla

Hulda Þorradóttir, Lækjarskóla

Þórey Eva Þórisdóttir, Hraunvallaskóla

Nökkvi Leó Kristjánsson, Skarðshlíðarskóla

Viðja Elísabet Magnúsdóttir, Engidalsskóla

Eva Björk Sturludóttir, Víðistaðaskóla

Kolbrún Hilmarsdóttir, Áslandsskóla

Stormur Björnsson, Öldutúnsskóla

Sara María Sigþórsdóttir, Setbergsskóla