Skólahátíð orðin hverfishátíð

Menningardagar sem vekja athygli út fyrir skólahverfið og setja skemmtilegan svip á samfélagið.

Áslandsskóli hlaut í gær viðurkenningu fræðsluráðs Hafnarfjarðar árið 2016 fyrir árlega menningardaga skólans sem byggja á virkri þátttöku allra nemenda, kennara og foreldra. Menningardagarnir hafa þróast úr því að vera skólahátíð í það að vera hverfishátíð þar sem allir áhugasamir eru boðnir velkomnir á opnar sýningar allra bekkja og í veitingasölu þar sem nemendur í 10. bekk sjá alfarið um framleiðslu, framreiðslu og rekstur sölunnar.

Menningardagar við Áslandsskóla voru haldnir þrettánda árið í röð um miðjan mars og var í ár unnið með verkefnið: Hafnarfjörður – bærinn minn.  Dagarnir verða umfangsmeiri með hverju árinu sem líður því mikill fjöldi gesta sækir skólann heim þá þrjá daga sem menningardagar standa yfir til að skoða þá vinnu sem nemendur hafa unnið undir dyggri leiðsögn starfsmanna skólans. Í ár voru útfærslur nemenda mjög fjölbreyttar og birtingarformið breytilegt en framkvæmd og túlkun er unnin í samvinnu nemendanna sjálfra. Söngleikur ársins „Trúir þú á skrítnar sögur“ var hugarsmíði Díönu Ívarsdóttur tónlistarkennara við skólann og hafði hann að sjálfsögðu beina tengingu við Hafnarfjörð og byggði þannig á gömlum sögum, hafnfirskum bröndurum, göflurum og frægum Hafnfirðingum svo fátt eitt sé nefnt. Óhætt er að segja að söngleikurinn hafi slegið í gegn í leikstjórn höfundar sem naut dyggrar aðstoðar nemenda og umsjónarkennara í þriðja bekk. Menningardagarnir setja skemmtilegan svip á skólalífið og samfélagið í Áslandinu og eru gestir í dag ekki einungis úr röðum stoltra foreldra.

Viðurkenning fræðsluráðs fyrir kennslufræðilega þróun og samvinnu í skólastarfi

Það voru Fanney D. Halldórsdóttir, sviðsstjóri fræðslu- og frístundaþjónustu Hafnarfjarðarbæjar og Rósa Guðbjartsdóttir, formaður fræðsluráðs sem afhentu Áslandsskóla viðurkenningu fræðsluráðs fyrir menningardagana. Skólastjóri og aðstoðarskólastjóri Áslandsskóla, þau Leifur S. Garðarsson skólastjóri og Unnur Elfa Guðmundsdóttir aðstoðarskólastjóri tóku við viðurkenningunni fyrir hönd starfsfólks skólans. Viðurkenninguna afhentu þau svo áfram til Díönu Ívarsdóttur tónlistarkennara og vildu með því leggja áherslu á mikilvægt framlag allra starfsmanna skólans til verkefnisins.  Í rökstuðningi með viðurkenningunni segir: „Menningardagar Áslandsskóla eru nokkrir skóladagar á ári þar sem fjölbreytt nám fer fram í gegnum margvíslega kennsluhætti á hinum ýmsu viðfangsefnum. Þess utan eru menningardagarnir hátíð í skólanum sem lýkur með opnu húsi þar sem foreldrar og aðrir gestir eru boðnir velkomnir til að sjá afrakstur vinnunnar. Með hátíðinni er nám nemenda gert sýnilegt fyrir aðra sem gefur þeim tækifæri til að miðla eigin námi og koma fram á ýmsan hátt, t.d. í söng, leikrænni tjáningu og kynningum. Í viðurkenningunni felst þakklæti og hvatning til skólans um mikilvægi þess að opna skólastarfið út í samfélagið en gefur nemendum jafnframt tækifæri til að mennta sig á fjölbreyttari hátt í skólastarfinu fyrir opnum tjöldum.“

Allt frá árinu 2008 hefur fræðsluráð Hafnarfjarðarbæjar veitt 1-3 viðurkenningar á ári til einstakra skólaverkefna sem þykja til fyrirmyndar og einkennandi fyrir skapandi skólastarf í Hafnarfirði. Hin síðustu ár hafa fjölmörg verkefni hlotið viðurkenninguna, verkefni sem hafa haft frumkvæði, fagmennsku og ábyrgð að leiðarljósi og ýta undir samstarf, hagnýtingu og þróun í skólastarfi og kennslufræði. Markmiðið er að að minna á gildi og mikilvægi skólastarfs í Hafnarfirði.