Automatic translation by Google Translate. We cannot guarantee that it is accurate.

Víðistaðatún

Víðistaðatún er fallegur almenningsgarður umkringdur hrauni við Víðistaðakirkju og skátaheimili Hraunbúa. Á svæðinu ættu allir að geta fundið sér eitthvað að gera við sitt hæfi.

Svæðið státar af fjölmörgum útilistaverkum sem tilvalið er að skoða og börn hafa gaman af að leika sér í. Til að gera það enn meira spennandi hefur Hafnarborg útbúið skemmtilegan ratleik sem byrjar í Hellisgerði og fer yfir á Víðistaðatún.

Nóg er að gera fyrir börnin. Þau geta leikið sér í aparólu, ærslabelg og kastala. Einnig er þar skógarlundur sem gaman er að leika sér. Þegar allir eru orðnir svangir er hægt að grilla í grillhúsi sem er rétt hjá kastalanum.

Í garðinum er eini tennisvöllur Hafnfirðinga og einnig sex holu frisbígolfvöllur. Frítt er á völlinn og ekki nauðsynlegt að bóka fyrirfram. Upplýsingaskilti um leikreglur og skipulag vallarins er á túninu fyrir neðan Víðistaðakirkju. Hér er vallarkort fyrir Frisbígolfvöllinn á Víðistaðatúni.

Á Víðistaðatúni er tjaldsvæði sem er opið frá miðjum maí fram í lok ágúst. 

Á svæðinu er stórt viðburðatún þar sem fjölmargar uppákomur eru haldnar árlega. Þar má nefna sýningar Hundaræktarfélags Íslands og Víkingahátíðina sem Rimmugýgur sér um, auk þess sem Krikketsamband Íslands er með reglubundnar æfingar á svæðinu yfir sumartímann.

Ábendingagátt