Hafnarfjörður er fjölskyldu- og barnvænt samfélag þar sem velsæld íbúa nýtur forgangs. Góð líðan byggir á heilbrigðu umhverfi, jafnrétti, sjálfstæði, forvörnum og uppbyggilegu líferni allra aldurshópa. Íbúar eiga að njóta tækifæra til þess að þroska sig og rækta andlega og félagslega heilsu.

Áherslur 2022 – 2025

• Innleiða Barnasáttmála inn í stjórnkerfi Hafnarfjarðarbæjar.
• Efla fjölbreyttar forvarnir til að stuðla að vellíðan íbúa á öllum aldri.
• Stuðla að auknum jöfnuði á meðal íbúa bæjarfélagsins.
• Hlúa að líðan og velferð eldri borgara.
• Stuðla að góðu aðgengi íbúa að heilbrigðisþjónustu.

Íbúar hafa fjölbreytt tækifæri til að stunda útivist, heilsueflingu og hreyfingu ásamt því að taka þátt í ýmiss konar íþrótta- og tómstundastarfi. Þátttaka í íþróttum stendur öllum til boða. Njóta má umhverfis og náttúru innan byggðar og í ósnortinni náttúru.

Áherslur 2022 – 2025

• Efla heilsu barna og ungmenna með fjölbreyttu íþrótta-og tómstundastarfi innan bæjarins.
• Styrkja Hafnarfjörð enn frekar sem heilsueflandi samfélag fyrir fólk á öllum aldri.
• Vernda, efla og bæta aðgengi að útivistar­perlum, grænum svæðum og strandlengju bæjarins.

Nýjar hugmyndir og þróun fjölbreytts atvinnulífs stuðlar að lifandi samfélagi og auknum atvinnutækifærum. Góðar aðstæður eru fyrir fyrirtæki til vaxtar og framþróunar. Einkenni bæjarins eru iðnaður, verslun og þjónusta auk nýsköpunar, hönnunar og handverks.

Áherslur 2022 – 2025

• Skapa umhverfi fyrir nýsköpun og framþróun fyrirtækja.
• Efla umhverfi og aðstöðu fyrir fjölbreytt fyrirtæki innan Hafnarfjarðarbæjar.
• Hvetja fyrirtæki til þess að auka atvinnutækifæri fyrir fatlað fólk.
• Vekja athygli á sérstöðu verslunar og þjónustu.

Fjölbreytt byggð tengir saman gamla og nýja tíma í Hafnarfirði. Þess er gætt að varðveita sögulega byggð, vistkerfi, náttúru og græn svæði. Ólík hverfi bjóða upp á fjölbreytilegt húsnæði sem mynda eitt sterkt samfélag.

Áherslur 2022 – 2025

• Fjölbreytilegt og öruggt húsnæði mæti ólíkum þörfum og óskum íbúa um búsetu.
• Efla gildi og sýnileika sögulegra hefða, sérstöðu og sérkenna hverfa.
• Vernda nærumhverfi og stuðla að endurheimt og jafnvægi í vistkerfi Hafnarfjarðar.
• Vakta og vernda náttúru og auðlindir með sjálfbærni að leiðarljósi.
• Vakta og varðveita menningarminjar með markvissri skráningu og verndarstefnu.
• Hlúa að áframhaldandi uppbyggingu og sérstöðu miðbæjarins og hafnarsvæðisins sem hjarta samfélagsins í Hafnarfirði.

Hafnarfjörður er leiðandi í að nýta orku og auðlindir á sjálfbæran hátt og íbúar hafa tækifæri til þess að tileinka sér vistvænan lífsstíl. Lögð er áhersla á lágmörkun losunar gróðurhúsalofttegunda, virkt hringrásarhagkerfi og vistvænar samgöngur. Íbúar geta sótt sér verslun og þjónustu í nærsamfélagi.

Áherslur 2022 – 2025

• Hvetja fyrirtæki til þess að leggja áherslu á sjálfbæra þróun í starfsemi sinni og miðla á gagnsæjan hátt upplýsingum um sjálfbærni.
• Stuðla að auknu valfrelsi íbúa í samgöngum.
• Styðja við endurvinnslu og flokkun sorps.
• Stuðla að því að sjálfbær orka sé aðgengileg og vinna að betri orkunýtingu hjá stofnunum og fyrirtækjum bæjarins.
• Hvetja til umhverfisvænna byggingarmáta.

Menningarstarf er undirstaða blómlegs mannlífs og aðdráttarafl fyrir innlenda og erlenda gesti. Með stuðningi við metnaðarfullt listalíf styrkjum við Hafnarfjörð sem menningarlegt samfélag og aukum lífsgæði bæjarbúa.

Áherslur 2022 – 2025

• Styrkja og efla nærþjónustu innan hverfa.
• Stuðla að fjölbreytileiki samfélagsins endurspeglist í öflugu menningarlífi og viðburðum.
• Auka sýnileika menningarstofnana og ýta undir virka þátttöku íbúa.
• Efla Hafnarfjörð sem viðkomustað allan ársins hring.
• Vinna að markvissri uppbyggingu á ferðamannastöðum og kynningarmálum í samstarfi við nágrannasveitarfélög.

Í námi er lögð áhersla á gæði, vellíðan, félagslegt öryggi, sjálfstæði og árangur. Borin er virðing fyrir ólíkum lífsháttum og fjölbreytni. Hvetjandi aðstæður til náms styðja við frumkvæði, samvinnu og sköpun. Nemendur þróa hæfileika sína á eigin forsendum og njóta stuðnings til að þroskast og dafna.

Áherslur 2022 – 2025

• Bjóða upp á menntun sem kemur til móts við fjölbreyttar þarfir barna.
• Virkja sköpunarkraft nemenda og starfsfólks.
• Virða ólíka lífshætti og skoðanir með því að efla þekkingu og styðja við inngildingu.
• Leggja áherslu á gott viðmót í öllu skólastarfi og jákvæðan skólabrag.
• Efla forvarnir og geðrækt hjá börnum og ungmennum.
• Valdefla nemendur og styrkja í félagsfærni.
• Auka þátttöku, ábyrgð og sjálfstæði nemenda á eigin námi og námsmati.
• Aukin teymisvinna og samstarf í öllu skólasamfélaginu.

Íbúum er gefinn kostur á að vera virkir þátttakendur í að móta umhverfi sitt og þeim gert fært að koma sjónarmiðum og hugmyndum á framfæri. Þannig er stuðlað að virku lýðræði og meiri sátt um mál og málefni.

Áherslur 2022 – 2025

• Stuðla að lýðræðislegri þátttöku.
• Hvetja til frjórrar umræðu og tryggja að ábendingar bæjarbúa komist í farveg.

Þjónusta Hafnarfjarðarbæjar mætir þörfum íbúa og er hlýleg, áreiðanleg og snjöll. Leitast er við að einfalda þjónustuna, gera hana skilvirka fyrir alla íbúa og leysa mál í fyrstu snertingu þar sem því má koma við.

Áherslur 2022 – 2025

• Auka skilvirkni í móttöku, afgreiðslu og vinnslu umsókna með sjálfsafgreiðslu, rafrænum leiðum og skýrum ferlum.
• Tryggja góða upplýsingagjöf og laga hana að ólíkri stöðu fólks.
• Efla þverfaglega samvinnu milli sviða og á meðal stofnana bæjarins.