Stóra upplestrarkeppnin 2020 – fyrsta hátíðin í kjölfar Covid19

Það þótti viðeigandi að fyrsta hátíðin í Hafnarfirði í kjölfar Covid19 væri lokahátíð Stóru upplestrarkeppninnar sem allajafna er haldin í Hafnarborg í mars ár hvert. “Um er að ræða uppskeruhátíð sem beðið er í ofvæni og í kristallast mikilvægi íslenskrar tungu, þrotlausar æfingar, árangur og eftirvænting”, eins og bæjarstjóri Hafnarfjarðar, Rósa Guðbjartsdóttir, komst svo vel að orði í ræðu sinni á hátíðinni. Hátíðin var einungis opin upplesurum og aðstandendum auk annarra þeirra sem hlutverk höfðu á hátíðinni. Forseti Íslands, Guðni Th. Jóhannesson, heiðraði upplesara og gesti með nærveru sinni, afhenti bókagjafir og flutti stutt ávarp.  

^{Verðlaunahópurinn með Forseta Íslands, bæjarstjóra Hafnarfjarðar, formanni fræðsluráðs Hafnarfjarðar og móður upplestrarkeppninnar. Aftari röð f.v.: Kristín Thoroddsen formaður fræðsluráðs Hafnarfjarðar, Forseti Íslands Guðni Th. Jóhannesson, Ingibjörg Einarsdóttir upphafsmaður keppninnar og Rósa Guðbjartsdóttir bæjarstjóri. Í fremri röð f.v. eru sigurvegarar keppninnar í ár: Dagbjörg Birna Sigurðardóttir í Setbergsskóla (3. verðlaun), Ellen María Arnarsdóttir í Hvaleyrarskóla (1. verðlaun) og Smári Hannesson í Lækjarskóla (3. verðlaun)}

Faglegur og fallegur upplestur 16 nemenda

Stóra upplestrarkeppnin hófst sem tilraunaverkefni um upplestur veturinn 1996-1997. Hefur keppnin eflst og stækkað með hverju árinu og má nú finna þátttakendur og þar með fyrirmyndir í upplestri á íslenskri tungu í nær hverju sveitarfélagi landsins. Uppskeruhátíð Stóru upplestrarkeppninnar í Hafnarfirði var að þessu sinni haldin í Víðistaðakirkju og voru þar í aðalhlutverki 16 nemendur í 7. bekkjum grunnskóla Hafnarfjarðar. Tveir nemendur frá hverjum grunnskóla stigu á stokk með faglegan og fallegan upplestur fyrir hönd síns skóla og fluttu texta og ljóð eftir skáld keppninnar. Skáld keppninnar í ár voru þeir Jón Jónsson úr Vör og Birkir Blær Ingólfsson sem einnig flutti hátíðarræðu. Afkomendur Jóns Jónssonar voru í salnum og voru þeir kallaðir upp og færðar gjafir.  Nemendur í Tónlistarskóla Hafnarfjarðar sungu og spiluðu á hljóðfæri og flutti Layan Ahmed Abukhalifa ljóð á arabísku. Forseti Íslands afhenti nemendum ljóðabók sem Félag íslenskra bókaútgefenda gaf öllum nemendum. Bæjarstjórinn í Hafnarfirði, Rósa Guðbjartsdóttir, flutti ávarp og hvatti nemendur til dáða samhliða þökkum fyrir fallegan upplestur.

Það standa allir uppi sem sigurvegarar

Stóra upplestrarkeppnin snýst ekki um að komast fyrstur í mark heldur um þjálfun og það að vanda sig í upplestri. Allir nemendur grunnskóla Hafnarfjarðar standa því uppi sem sigurvegarar eftir hátíðina. Fremst meðal jafningja voru þau Ellen María Arnarsdóttir í Hvaleyrarskóla sem hlaut 1. verðlaun fyrir upplestur sinn, Smári Hannesson í Lækjarskóla sem hlaut 2. verðlaun og Dagbjörg Birna Sigurðardóttir í Setbergsskóla sem hlaut 3. verðlaun. Kolbeinn Tumi Árnason fékk verðlaun fyrir boðskort hátíðarinnar. Viðurkenningar voru jafnframt veittar í smásagnasamkeppni grunnskólanna. Sagan Það skiptir nefnilega máli eftir Jón Ragnar Einarsson í 10. bekk Hraunvallaskóla lenti í fyrsta sæti, sagan Spegillinn eftir Guðmund Pétur Dungal Níelsson í 10. bekk í Víðistaðaskóla lenti í öðru sæti og í þriðja sæti lentu tvær sögur, Tvöföld gleði eftir Sögu Maríu Michaelsdóttur og Ættarleyndarmálið eftir Önnu Lilju D. Gunnarsdóttur en þær eru báðar í 10. bekk í Víðistaðaskóla.

Nýlega var Ingibjörg Einarsdóttir, upphafsmaður keppninnar, í viðtali í Vitanum hlaðvarpi Hafnarfjarðarbæjar. Þar fer hún yfir sögu keppninnar, markmið og tilgang. Við hvetjum ykkur til að hlusta á viðtalið.