Styrkur úr Lýðheilsusjóði 2017

Óttarr Proppé, heilbrigðisráðherra úthlutaði á föstudaginn rúmlega níutíu milljónum króna í styrki úr Lýðheilsusjóði til 139 verkefna og rannsókna. Styrkþegar eru staðsettir um land allt og verkefnin ætluð öllum aldurshópum. Sjá lista yfir verkefni og styrkþega 2017. Hafnarfjarðarbær er einn styrkþega í ár.

Heilsubærinn Hafnarfjörður

Verkefni Hafnarfjarðarbæjar snýr að markvissri innleiðingu á heilsueflingarstefnu (lýðheilsustefnu) í þverfaglegri samvinnu við alla hlutaðeigandi aðila samfélagsins um heilsueflingu
og forvarnir á sviði næringar, hreyfingar, geðræktar og áfengis- og vímuvarna
(og tóbaksvarna) fyrir bæjarbúa. Verkefnið stuðlar að heilsueflingu fyrir alla aldurshópa innan
Hafnarfjarðar. Horft til fjögurra þátta: næring, hreyfing, líðan og
lífsgæði/forvarnir. Gert er ráð fyrir að hver þáttur sé í brennidepli í eitt
ár í senn en þó verður unnið með aðra þætti í leiðinni sem auðvelt er að
framkvæma. Hafnarfjarðarbær fékk 500.000.- kr styrk til verkefnisins úr Lýðheilsusjóði 2017.

Umsóknir í Lýðheilsusjóð – úthlutanir 2017

Við auglýsingu eftir umsóknum árið 2017 var m.a. lögð áhersla á aðgerðir til eflingar geðheilsu, forvarnir gegn sjálfsvígum, áfengis-, tóbaks- og vímuvarnir og verkefni sem beinast að minnihlutahópum til að stuðla að jöfnuði til heilsu. Ráðherra úthlutaði styrkjunum að fengnum tillögum stjórnar Lýðheilsusjóðs sem mat umsóknir út frá því hvernig þær féllu að hlutverki sjóðsins sem er skilgreint í lögum um landlækni og lýðheilsu, nr. 41/2007  og lýðheilsustefnu velferðarráðuneytisins

Athöfnin hófst með ávarpi Óttarrs Proppé heilbrigðisráðherra, þá flutti Kristín Heimisdóttir formaður Lýðheilsusjóðs ávarp og kynnt var verkefni Helgu Arnardóttur, fyrrum styrkhafa en verkefni hennar HappApp er eitt þeirra verkefna sem hlotið hefur styrk úr Lýðheilsusjóði. Happ App er app sem byggir á vísindum jákvæðrar sálfræði. Í appinu eru æfingar sem efla hamingju og andlega vellíðan notenda. Meðal verkefna sem hljóta styrk úr Lýðheilsusjóði árið 2017 eru verkefni Núvitundarsetursins um innleiðingu núvitundar í sex grunnskólum skv. breskri fyrirmynd, verkefni Ársæls Arnarsonar sem er rannsókn á heilsu og lífskjörum skólabarna á Íslandi í alþjóðlegum samanburði, verkefni Akraneskaupstaðar um ráðgjöf og aðgerðir til heilsueflingar fólks 60 ára og eldri og samstarfsverkefni Kynís, Ástráðs, FKB og heilsueflandi framhaldsskóla um smokkasjálfsala í framhaldsskólum til að sporna við óvenju hárri tíðni klamydíu hér á landi.