Sunnudaginn 14. desember kl. 13-15 bjóðum við gestum að koma saman í fjöltyngdri listasmiðju þar sem þátttakendur munu búa til stórt „teppi“ úr pappa en þá munu þátttakendur skiptast á að leggjast á pappaörkina meðan annar gerir útlínuteikningu af líkamanum með skærum pastelkrítum. Allir geta síðan skreytt útlínurnar með mynstrum og litum sem endurspegla ólíka persónuleika. Þegar fleiri form bætast við breytist pappinn svo í líflega mynd af líkömum í mismunandi stærðum, stellingum og litum.

Litateppið verður tákn um þá samveru og gleði sem einkennir hátíðirnar. Þá býður smiðjan tækifæri til sköpunar, samvinnu, aukinnar líkamsvitundar og virðingar fyrir fjölbreytileikanum í öllum sínum myndum, þar sem börn og fullorðnir sjá sig sem hluta af sameiginlegu listaverki. Tungumál smiðjunnar eru spænska, íslenska, enska og þýska, undir leiðsögn listamannanna Hugos Llanes og Anne Rombach.

Við munum einnig smakka ljúffengan mexíkóskan ávaxtadrykk og prufa ýmsa skemmtilega leiki, auk þess sem boðið verður upp á smákökur sem gætu jafnvel þurft smá skreytingu…!

Hugo Llanes (f. 1990) er mexíkóskur listamaður, búsettur í Reykjavík, sem styðst við ólíka miðla í listsköpun sinni, svo sem gjörninga og innsetninga. Hugo er með MA-próf í myndlist frá Listaháskóla Íslands.

Anne Rombach er þýsk listakona sem býr og starfar á Íslandi. Hún nam ljósmyndun við Listaakademíuna í Leipzig og lauk MA-gráðu í myndlist frá Listaháskóla Íslands, þar sem hún stundar nú framhaldsnám í „Listum og velferð“.

Á mínu máli er viðburðaröð sem miðar að því að auka aðgengi fólks með margs konar bakgrunn að Hafnarborg með því að bjóða gesti velkomna á ólíkum tungumálum. Viðburðurinn er samstarf Hafnarborgar og GETU – samtaka sem með fjölbreyttum viðburðum og félagsstarfi leitast við að stuðla að inngildingu og jákvæðri fjölmenningu. Verkefnið er styrkt af safnasjóði.

Smiðjan fer fram á jarðhæð safnsins og er opin öllum aldurshópum. Engrar fyrri kunnáttu í listsköpun er krafist en börn skulu vera í fylgd með foreldri eða forráðamanni. Eins og alltaf er þátttaka í smiðjum sem og aðgangur að sý‎ningum safnsins gestum að kostnaðarlausu.