Heilsubærinn Hafnarfjörður og Hress standa fyrir viðburði til að efla heilsu verðandi mæðra og kvenna með ungabörn í fæðingarorlofi. Markmiðið er að auka aðgengi þeirra að heilsurækt. Miðvikudaginn 17. apríl býðst þeim að koma í tíma í líkamsræktarstöðinni. Litlu börnin velkomin með.

Sandra Bjarnadóttir þjálfari leiðir tímann. Hún er lærður hjúkrunarfræðingur, ljósmóðir og IAK þjálfari. Hún stýrir námskeiðinu Móðir og barn þar sem hún hjálpar konum á heilsusamlegan máta aftur í form á því stigi sem hentar hverri og einni. Í tímanum eru gerðar styrktar- og þolæfingar með réttri líkamsbeitingu. Sérstök áhersla er einnig á að styrkja grindarbotnsvöðva, djúpvöðva, kvið- og bakvöðva.

Góð aðstaða er fyrir börnin, en þau geta sofið beint fyrir utan æfingasalinn, hægt er að ganga út um hurð á æfingasalnum til að sækja eða sinna börnunum. Fyrir innan eru barnastólar, teppi, leikgrindur og fleira fyrir þær sem vilja nýta sér slíkt.

Hér skráir þú þig til leiks.