Vinnustofa um heilsueflandi grunnskólastarf

Heilsueflandi fulltrúar grunnskóla í Hafnarfirði deila heilsueflandi hugmyndum og reynslusögum

Átta af tíu grunnskólum Hafnarfjarðar eru í dag heilsueflandi grunnskólar. Hafnarfjarðarbær ásamt Embætti landlæknis hélt í aðdraganda páska vinnustofu í Hafnarborg þar sem fulltrúum allra grunnskóla var boðin þátttaka. Ingibjörg Guðmundsdóttir verkefnastjóri heilsueflandi grunnskóla hjá embætti landlæknis hélt upphafserindi. Þar fjallaði hún um gildi þess og ávinning fyrir allt skólasamfélagið að taka þátt í verkefninu heilsueflandi grunnskóli auk þess að kynna fyrir þátttakendum hve auðvelt er að hefja ferlið að verða heilsueflandi grunnskóli. Síðan komu fulltrúar flestra grunnskóla og kynntu ýmis áhugaverð verkefni sem tengjast heilsueflingu. Hver og einn skóli er að sinna fjölmörgum heilsueflandi verkefnum hvort sem hann er þátttakandi í verkefni landlæknis eða ekki.

Hollt mataræði, hreyfing, líðan og mæling á stöðu og árangri

Öldutúnsskóli kynnti útivistarval fyrir elstu nemendur skólans þar sem þau kynnast útiveru auk þess sem valfagið Fimmvörðuháls var kynnt.  . NÚ kynnti nokkur vel valin verkefni skólans en eitt þeirra snýst um að auka við hollt mataræði og hreyfingu og mæla árangur. Það sem gerði verkefnið enn áhugaverðara er að nemendur fengu stig fyrir þátttöku en ef foreldrar tóku einnig þátt fengust auka stig þannig að verkefnið varð, þegar uppi var staðið,  að heilsueflingu fyrir alla fjölskylduna. Skarðshlíðarskóli kynnti Míluverkefnið sitt en á hverjum degi ganga og hlaupa nemendur í 10-15 mínútur og ábati af slíku verkefni umtalsverður fyrir nemendur. Hjördís Jónsdóttir deildarstóri í Áslandsskóla kynnti niðurstöður úr meistararitgerð sinni Sýn og áherslur skólastjóra á velfarnað kennara í grunnskólum og Sigurlaug Rúna Guðmundsdóttir frá Hraunvallaskóla kynnti Evrópuverkefnið, heilsuefling í skólastarfi og gæðamati.  Ragnhildur Einarsdóttir frá Lækjarskóla kynnti leyndarmál Lækjarskóla varðandi Lífshlaupið 2023, en skólinn vann grunnskólakeppnina í ár.  Ragnheiður Ólafsdóttir og Hreiðar Gíslason sögðu frá áherslum Víðistaðaskóla í heilsueflingu.

Skólaumhverfi sem stuðlar að andlegri, líkamlegri og félagslegri heilsu og vellíðan

Heilsueflandi grunnskólum er ætlað að styðja skóla í að vinna markvisst að heilsueflingu í starfi sínu. Í því felst að skapa skólaumhverfi sem stuðlar að andlegri, líkamlegri og félagslegri heilsu og vellíðan nemenda og starfsfólks í samvinnu við heimili og nærsamfélag. Skólar koma sér upp heildrænni og vel skipulagðri heilsustefnu þar sem horft er á allt skólasamfélagið í heild. Innleiðing felur einnig í sér aðgang að vefsvæði á www.heilsueflandi.is, sem er rafrænt kerfi þar sem hver grunnskóli heldur utan um heilsueflingarstarf skólans.

Nálgun sem nýtist í skólastarfinu til framtíðar

Heilsueflandi grunnskóli er ekki verkefni með upphaf og enda heldur nálgun sem nýtist í starfinu til framtíðar. Hver grunnskóli vinnur á þeim hraða sem entar og reiknað er með að skólinn taki sér allt að ár í undirbúning. Undirbúningsvinnan felst í því að mynda stýrihóp, skoða stöðu grunnskólans, gera grunn að heilsustefnu, fylla út í gátlista á lokuðu vefsvæði sem þátttökuskólar hafa aðgang að. Þar getur hver og einn skóli metið eigin stöðu og í framhaldinu haldið utan um markvisst heilsueflingarstarf. Þátttaka er grunnskólum að kostnaðarlausu og ekki er þörf á undirbúningsvinnu áður en sótt er um. Heilsueflandi grunnskóli er afurð þróunarstarfs sem var unnið í samstarfi við fjölmarga hagsmunaaðila. Við mótun heilsueflandi grunnskóla var stuðst við efni frá Samtökum heilsueflandi skóla í Evrópu (Schools for Health in Europe, SHE).