Saklaust er nýfætt barn, nýfæddur ungi, það nýja sem stendur frammi fyrir óþekktum heimi. Við mótumst af umhverfi, uppeldi, reynslu, menningu og gildum, en grunneðli hvers einstaklings er ólíkt.
Við flokkum alla í ákveðna hópa, tegundir, hættustig og yfirráð. Hvað gerist ef manneskjan fellur alla varnarmúrana — eða hefur aldrei lært að byggja þá?
Líklegast yrði henni rústað, hún stendur þá ein í sakleysi sínu, veikburða og neyðist til að berjast fyrir lífi sínu.
Ef sigurinn vinnst, þá hefur hún öðlast djúpa þekkingu og lært að enginn er eins. Það væri harmleikur ef hún tæki upp sömu leikreglur og þeir sem reyndu að eyðileggja hana.
Mikilvægasti lærdómurinn er að draga sig frá því sem þjónar ekki þörfum hennar, frá því sem særir og tortímir.
Sagan í dýramálverkunum er að leyfa hverjum einstaklingi að finna sína eigin leið, sinn stað — og passa sig á því sem getur grafið undan lífi þeirra.
Fögnum fjölbreytileikanum og því sem gefur okkur lífsorku og hvetur okkur áfram í lífinu.
— Laufey Elíasdóttir, 2025
————–
Í listinni andar hún
Frá unga aldri hefur Laufey leitað í listina — tónlist, kvikmyndir, leiklist, myndlist…
Sautján ára stofnaði hún pönkhljómsveitina PPPönk; á tvítugsaldri lærði hún kvikmyndaleik í Los Angeles; þrítug fann hún heimili á leiksviðinu í Noregi.
Ári áður en hún flutti til Noregs byrjaði hún að mála dýr — hljóð og vökular verur fullar af villtum sannleika.
Fyrir Laufeyju er listin súrefni — leið til að anda, lækna og skilja sjálfa sig og heiminn.
Óbundin við form listarinnar, hlustar hún og færir sig milli miðla.
Fyrir hana er listin ekki loka svarið — hún er sú leið sem ferðalagið er.
Sérstök sýningaropnun verður fimmtudaginn 23. október frá 18:00-20:00 og þú ert velkomin !
