Hús við Ráðhústorg til sölu – frábær tækifæri

Frábær tækifæri í hjarta Hafnarfjarðar

Hafnarfjarðarbær auglýsir Strandgötu 1, Austurgötu 4a og Austurgötu 6 til sölu og óskar eftir tilboðum. Eignirnar verða allar seldar saman og er lágmarksverðið 700 m.kr. Staðsetning fasteigna og lóða býður upp á mikla möguleika og tækifæri. Áhersla er lögð á að starfsemi á neðstu hæðum falli vel að stefnu bæjarins um að styrkja hjarta Hafnarfjarðar og auka enn frekar aðdráttarafl hans. Fasteignirnar hýsa í dag m.a. Bókasafn Hafnarfjarðar sem flyst í nýtt og glæsilegt húsnæði í Firði verslunarmiðstöð í upphafi árs 2026.

Lágmarksverð er 700 m.kr.

Bílastæði eru leyst samkvæmt deiliskipulagi. Fasteignamat og lóðarmat núverandi bygginga er tæpar 560Mkr. Gatnagerðargjöld og byggingarréttargjöld vegna nýrra fermetra og byggingarréttargjald vegna breytingar atvinnuhúsnæðis í íbúðir, ef miðað er við vísitölu í október 2024 er alls kr. 126.494.490. Hafnarfjarðarbær óskar eftir tilboðum í eignirnar. Innifalið er gatnagerðargjald og byggingarréttargjald skv. deiliskipulagi. Lágmarksverð er 700 m.kr. Hægt er að skoða teikningar af fasteignunum á Kortavef Hafnarfjarðar.

• Strandgata 1. Miðbæjarskipulag Hafnarfjarðar gerir ráð fyrir breyttri nýtingu á Strandgötu 1 sem í dag hýsir Bókasafn Hafnarfjarðar. Þar er heimilt að stækka eignina og breyta í 11 íbúðir á efri hæðum. Á jarðhæð skal vera verslun og þjónusta. Þá skulu væntir lóðarhafar vinna með tillögur ASK arkitekta og brjóta upp þakgerð núverandi byggingar. Hafnarfjarðarbær er að færa bókasafnið annað og gert er ráð fyrir að lóðirnar og eignirnar verði lausar til nýtingar í upphafi árs 2026.
• Austurgata 4a. Þar er heimilt að setja kvist á norðurhlið hússins og gert ráð fyrir að það verði endurgert í upphaflegri mynd. Þar er gert ráð fyrir 2 íbúðum á efri hæðum frá Austurgötu og verslun/þjónustu frá Strandgötu.
• Austurgata 6. Austurgata 6 er nýbygging, 2 hæðir, ris og kjallari og gert ráð fyrir 2 íbúðum í því húsi frá Austurgötu og þjónustu/verslun frá Strandgötu.

Tilboð og ítarleg greinargerð

Tilboðsgjafi skal með tilboði sínu um kaupverð einnig skila greinargerð um hvers konar starfsemi er ráðgerð á jarðhæðum fasteignanna. Jafnframt skulu vera ítarlegar upplýsingar um tilboðsgjafa, s.s. fjárhagsupplýsingar, greiðslugeta og upplýsingar samstarfsaðila ef það á við. Tilboðsgjafar skulu gera grein fyrir fjármögnun og greiðslum fyrir eignirnar. Við mat á tilboðum verður, sem fyrr segir, sérstaklega litið til hugmynda sem taldar eru styrkja starfsemi og auka mannlíf miðbæjarins. Fyrirspurnir um fasteign skulu berast fyrir kl. 12, þann 15. nóvember á netfangið: hafnarfjordur@hafnarfjordur.is. Fyrirspurnum verður svarað innan fjögurra daga. Tilboðsfrestur rennur út kl. 12 föstudaginn 22. nóvember 2024.

Frávikstilboð

Heimilt er að gera frávikstilboð, þar sem tilboðsgjafar víkja frá deiliskipulagi, t.d. með annarri nýtingu á efri hæðum en allur kostnaður vegna deiliskipulagsbreytinga, mun falla á tilboðsgjafa. Frávikstilboð verða metin sérstaklega.

Fylgiskjöl

• Greinargerð. Ask arkitektar
• Miðbæjarskipulag Hafnarfjarðar. Reitur 1. Deiliskipulagsuppdráttur
• Miðbæjarskipulag Hafnarfjarðar. Reitur 1. Skýringauppdráttur
• Miðbæjarskipulag Hafnarfjarðar. Reitur 1. Þrívíddarmyndir 
• Mæliblað
• Skráning í fasteignaskrá

Tilboðsfrestur

Tilboð ásamt öllum fylgigögnum þurfa að berast til Hafnarfjarðarbæjar, Strandgötu 6, merkt – Strandgata 1, Austurgata 4a og Austurgata 6 – fyrir kl. 12 föstudaginn 22. nóvember 2024. Sama dag og á sama tíma verða tilboðin opnuð í bæjarráðsalnum í Ráðhúsi Hafnarfjarðar í viðurvist bjóðenda er þess óska.