Listin lék við áhorfendur á lokahófi skapandi sumarstarfa

Listin leikur við Hafnfirðinga

Ljóst var að hæfileikabúnt leynast í Hafnarfirði þegar lokahátíð skapandi sumarstarfa var haldin í gær í Nýsköpunarsetrinu við Lækinn. Fjöldi fólks mætti til að fagna uppskerunni með unga fólkinu sem hefur í sumar unnið að hugðarefnum sínum – Skrifa bók, semja ljóð, hanna föt, vinna list úr tilfinningum, garni og hljóði.

Fyrst á uppskerusviðið stigu Una Mist og Kristijonas Groblys sem fluttu tónverkið Ómstaður með handgerðum hljóðfærum. Tónlistin var seyðandi, gullfalleg. Næst las Iða Ósk Gunnarsdóttir eigið ljóð en hún hefur í sumar samið meðal annars í Hellisgerði. Svo las Smári Hannesson úr bók sinni Eldar og kynnti einnig fyrstu bókina sína fyrir áhorfendum, sem hann gaf út 14 ára gamall. Tómas Vigur sló svo lokatóninn þegar hann lék Dagnýju og fleiri lög á fiðluna sína, en hann hefur í sumar haldið samskipsnámskeið fyrir unga fiðluunnendur á grunn- og miðstigi.

Þorbjörg Signý Ágústsson, leiðbeinandi starfsins, hélt opnunarræðu: „Það er svo dýrmætt að búa í samfélagi þar sem listir fá að blómstra og ungmenni fá tækifæri til að skapa, vaxa og láta ljós sitt skína. Við í bænum tölum oft um Hjarta Hafnarfjarðar — en ég tel að það hjarta slái í fólkinu hér: íbúunum, starfsfólki bæjarins og ekki síst í ungmennunum okkar sem eru framtíð og von okkar allra.“

Gargandi snilld á göngunum

Eftir kynninguna gafst gestum færi á að ganga um Nýsköpunarsetrið og kynnast þessum verkum betur en einnig öðrum en alls voru hóparnir níu í sumar og einstaklingarnir tíu. Þar sýndi Birta Bjarkardóttir verkefni sitt Vefnaður vætta sem snýst um að sauma fatnað huldufólks með sögum um huldufólk í Hafnarfirði til hliðsjónar. Þar var Mirra Björt Hjartardóttir með verkið sitt „Tilfinningar“,  sem snýst um að styðja ung börn í að skilja eigin tilfinningar, setja sig í spor annarra og læra að tjá sig á jákvæðan og meðvitaðan hátt.

Einnig mátti hitta myndlistarkonuna Rán Sigurjónsdóttir, sem er nemi í grafískri hönnun við Listaháskóla Íslands. Hún heldur einstaka listasýningu í The Shed í byrjun september, á vegum skapandi sumarstarfa í Hafnarfirði, þar sem hún miðlar sinni sýn á heim álfanna í olíumálverkum á viðarplötur. Ekki missa af því.

Íris Egilsdóttir var á gólfinu með frábært verk en hún vinnur að því að hanna og útfæra prjónað verk úr ull, sem ber nafnið Áferð fjallanna. Það er innblásið af skuggunum, dýnamíkinni, formunum og áferðum fjallanna í kring.

Þorbjörg Signý þakkaði unga fólkinu fyrir samstarfið. „Ég hef verið svo einstaklega heppin að fá að kynnast þessum frábæra hópi og það fer ekki á milli mála að þessi hópur hefur veitt mér innblástur, og fyllt mig stolti og von. Ég hlakka svo til að fylgjast með vegferð þeirra áfram, hvert sem leiðirnar liggja. Þau eru bara svo frábær! Til ykkar langar mig að segja, takk kærlega fyrir mig. Takk fyrir traustið, spjöllin og sumarið. Og vá, hvað ég er heppin að þið eruð minn fyrsti hópur sem umsjónarmaður. Þið hafið gert sumarið mitt ómetanlega áhugavert og skemmtilegt. Ég veit að þið massið allt sem þið takið ykkur fyrir hendur. Og innilega til hamingju með sumarið og verkefnin ykkar,“ sagði hún.

UM SKAPANDI SUMARSTÖRF 2025

Sumarið 2021 ákvað Hafnarfjarðarbær í samstarfi við Ungmennahús bæjarins, Hamarinn, að endurvekja verkefnið “Skapandi sumarstörf” sem hafði verið starfrækt sumarið 2017. Þá bauðst einstaklingum og hópum á aldrinum 18-25 ára að koma með hugmyndir að skapandi verkefnum í Hafnarfirði. Enn fá valdir hópar tækifæri til að starfa við ýmis skapandi verkefni á ýmsum sviðum lista sem einnig lífga upp á mannlífið í bænum, gleðja ferðamenn og íbúa með einum eða öðrum hætti. Starfsfólki Skapandi sumarstarfa, sem rekið er sem hluti af Vinnuskóla Hafnarfjarðar er ætlað að glæða bæinn lífi, gera hann skemmtilegri, fallegri og fjölbreyttari með listrænum og skapandi uppákomum. Verkefnin eru fjölbreytt og höfða til mismunandi aldurshópa og áhugasviða. Þorbjörg Signý Ágústsson er verkefnastýra Skapandi sumarstarfa.

Já, listin á svo sannarlega framtíðina fyrir sér!