Ljósmyndavélasýning á Ban Kúnn á Safnanótt

Stórkostlegt safn á Ban Kúnn

Ef þær gætu talað! er yfirskrift ljósmyndavélasýningar á veitingastaðnum Ban Kúnn í Hafnarfirði á Safnanótt 2025. Svavar G. Jónsson, eigandi myndavélanna og veitingastaðarins, sá gullið tækifæri að taka þátt Safnanótt og bjóða fólki að skoða stórbrotið myndavélasafnið.

„Upphaf þessa safns má rekja til „ljósmyndadellu“ sem ég fékk um fermingu! Já, það eru að verða 60 ár síðan, svo það kennir ýmissa grasa í safninu,“ segir Svavar. Ljósmyndavélarnar hans eru frá árinu 1896 til dagsins í dag. Þar á meðal myndavélin sem hann keypti fyrir fermingarpeningana sína.

Á sjötta hundrað myndavéla

„Á sýningunni eru á sjötta hundrað filmuvéla en tvær digital vélar fá að fljóta með. Safnið á um 60 slíkar vélar en þær eru í geymslu, þær heilla mig bara ekki eins og filmuvélin,“ lýsir Svavar.

„Það er sjarmi yfir þessum gömlu tækjum, það að dunda sér við að þrífa þær og laga smávegis er góð og skemmtileg dægrastytting. Einnig þarf auðvitað að skrá safnið, tegund, einkenni og aðra sögu vélanna eins nákvæmt og hægt er. Fyrir kemur að engar upplýsingar er að hafa um vélar nema bara tegund.“

Sýningin á Safnanótt verður á tælenska veitingastaðinn Ban Kúnn sem er við Tjarnarvelli í Hafnarfirði og hefur staðið þar í ellefu ár. Hún verður stærri í sniðum en aðra daga, en skápar fullir af vélum prýða staðinn.

Hönnun og tilraunir á bakvið hverja vél

Svavar er heillaður af myndavélum. „Margir telja að hlutir sem þeir meðhöndla dagsdaglega hafi bara orðið til og hugsa ekkert út í þá vinnu sem liggur að baki. Hönnun, framleiðsla, tilraunir og aftur tilraunir er það sem liggur að baki hverrar ljósmyndavélar,“ lýsir Svavar.

Þótt við öll berum á okkur myndavélar í símunum séu enn þónokkrir sem nýti þá gömlu tækni að taka myndir á filmur „… nokkuð sem þótti ganga næst göldrum áður fyrr,“ skrifar hann í lýsingunni á sýningunni og hvernig safnarar eins og hann hafi sankað vélum að sér. Hann ætlar að segja sögur sumra vélanna á Safnanótt.

„Það að safna myndavélum er þónokkuð útbreitt áhugamál og einnig eru erlendis sérhæfð söfn með ljósmyndabúnað og myndavélar,“ segir hann.

Svavar með vélina sem hann keypti fyrir fermingarpeningana.

Tækifæri til að njóta gamalla gripa

Gríðarleg þróun hafi orðið á síðustu árum hvað varðar myndatökur og úrvinnslu mynda eins og allir viti.

„Það er gaman að fylgjast með því þegar hingað á Ban Kúnn kemur eldra fólk með barnabörnin. Benda á og segja frá því að þau hafi átt svona eða svona myndavél. Þá spyrja börnin gjarnan en „ amma,  hvar sérðu myndina?“ vön því að sjá myndir strax á símanum,“ lýsir Svavar.

„Þessi sýning er sett upp til að gefa fleirum, en mér safnaranum, tækifæri á að njóta þessara fallegu gripa. Hér eru myndavélar sem hafa verið notaðar til að taka venjulegar fjölskyldumyndir, fréttamyndir allskonar, myndir af slysum,  á morðstað ( erlendis) og svo mætti lengi telja,“ segir hann.

„Ef þær gætu talað, er ég ekki viss um að vilja heyra allt sem þær hefðu að segja.“