Samspil hafnar og bæjar – rammaskipulag samþykkt

Rammaskipulag fyrir Flensborgarhöfn og Óseyrarsvæði var
samþykkt á fundi bæjarstjórnar í dag. Rammaskipulagið er stefnumótandi
framtíðarsýn um heildaryfirbragð hafnarsvæðisins þar sem gerð er grein fyrir
öllum helstu efnistökum við uppbyggingu sem síðan verður útfærð nánar í
deiliskipulagi. Við tekur nú aðalskipulagsferli og síðan deiliskipulagsvinna
fyrir einstaka reiti.

„Nýtt rammaskipulag markar tímamót. Nú getum við
hafist handa við uppbyggingu á hafnarsvæðinu okkar“ segir Rósa Guðbjartsdóttir
bæjarstjóri Hafnarfjarðar sem er ánægð með þá vinnu og þá framtíðarsýn sem nýtt
rammaskipulag felur í sér. „Hafnarsvæðið býður upp á mikla möguleika og
tækifæri bæði til búsetu og rekstrar og efa ég ekki að eftirspurn eftir íbúðum og
lóðum eigi eftir að vera mikil. Þarna mun rísa skapandi og skemmtilegt hverfi
sem hefur sterka tengingu við sögu, sjóinn og miðbæinn.“

Blönduð byggð í sátt
við aðliggjandi hverfi og hafnarstarfsemi

Markmið rammaskipulags fyrir hafnarsvæðið er að endurmóta
uppbyggingu við Fornubúðir, Flensborgarhöfn og Óseyrarsvæði með blandaðri
byggði í sátt við aðliggjandi hverfi og hafnarstarfsemi. Til stendur að skapa
heildstæðari byggð í anda sögu og umhverfisgæða staðarins með betri landnotkun
og nýtingu innviða. Áhersla er lögð á að rekstur fyrirtækja á hafnarsvæðinu
verði tryggður og að þar sé gott viðlegu- og þjónustusvæði fyrir minni
fiskiskip, smábátaútgerð og skemmtibáta. Rammaskipulagstillagan endurspeglar
markmið svæðisskipulags höfuðborgarsvæðisins með tilliti til þéttingar byggðar
á fyrirhuguðum þróunar- og samgönguási. Áhersla er lögð á vistvænar samgöngur,
m.a. með góðum tengingum við aðliggjandi byggð s.s. hjóla- og göngustíga og nálægð
við biðstöð Borgarlínu á Strandgötu. Meðfram hafnarbakkanum er komið fyrir
bryggjupöllum sem mynda samfellda gönguleið frá miðbæ að Fornubúðum 5 og
tengjast útivistarsvæði og torgum. Opin svæði og sjónlínur milli húsa tryggja
að sjónræn tengsl verði á milli hafnarinnar og byggðar ofan í hlíðinni.

https://www.youtube.com/watch?v=7CZ3lOwnXk4

^{Kynningarmyndband
arkitekta um útlit og umgjörð rammaskipulagsins sem einnig sýnir sögu,
starfsemi og framtíðarsýn Hafnarfjarðarhafnar.}

Ára langur
undirbúningur

Frá árinu 2003 hefur með nokkrum hléum verið unnið að
undirbúningi fyrir nýtt rammaskipulag Flensborgarhafnar og Óseyrarsvæðis.
Haustið 2014 var haldin opinn íbúafundur um framtíð hafnarsvæðisins og í
framhaldinu unnin forsögn fyrir svæðið. Í ársbyrjun 2018 var auglýst opin
hugmyndasamkeppni þar sem tvær tillögur báru sigur bítum. Ákveðið var að
sameina vinningstillögurnar í eina og byggir þetta rammaskipulag á niðurstöðum
þeirrar vinnu. Til að skapa góðan hljómgrunn og sátt um rammaskipulagið voru
haldnir fjórir samráðsfundir fyrir íbúa, lóðarhafa, eigendur fyrirtækja og aðra
hagsmunaaðila. Á fundi bæjarstjórnar í
dag var árangur þessarar vinnu skjalfestur í formi nýs rammaskipulags sem nú
fer í aðalskipulagsferli og deiliskipulagsvinnu.

• Sjá upplýsingasíðu um framkvæmdir við Flensborgarhöfn og Óseyrarsvæði
• Sjá nýtt rammaskipulag fyrir Flensborgarhöfn og
  Óseyrarsvæði