Leikskólar

Sækja um leikskóladvöl

Þú sækir um leikskóladvöl fyrir barnið í Völu. Umsókn þarf að skila inn fyrir 1. mars það ár sem óskað er eftir að barnið byrji.

Lögheimili og umsókn

Það er hægt að sækja um leikskólapláss og vera á biðlista þótt barnið sé ekki með lögheimili í Hafnarfirði. Þegar aðlögun barnsins hefst verður það að vera með skráð lögheimili í Hafnarfirði. Ef lögheimilið hefur ekki verið flutt fyrir þann tíma fellur úthlutað pláss því miður niður.

Val á leikskóla

Þú getur valið fleiri en einn leikskóla í umsókninni. Við hvetjum þig til að skoða þá leikskóla sem eru í boði, hafa samband við leikskólastjóra og kynna þér starfið.

• Aðalval: Við reynum eftir fremsta megni að verða við óskum um leikskóla í aðalvali.

• Aukaval: Ef ekki er laust í þeim leikskóla sem þú valdir fyrst, skoðum við næsta val.

• Annað laust pláss: Ef enginn af völdum leikskólum getur tekið á móti barninu fær barnið pláss í þeim leikskóla sem laust er.

Dvalartími

Þú getur valið dvalartíma frá 4 til 8,5 klukkustundum á dag, eftir því hvað hentar þinni fjölskyldu best. Breytilegur dvalartími er í boði fyrir öll leikskólabörn en að lágmarki 4 klukkustundir á dag.

Úthlutun á leikskólaplássi

Þegar barnið fær pláss á leikskóla færðu tölvupóst með boði um að staðfesta vistina hjá leikskólastjóra. Börn raðast á biðlista eftir kennitölu og röð á biðlista ræður hvaða barn fær boð um leikskólapláss. Eldri börn ganga fyrir yngri börnum. Börn sem falla undir skilgreiningu um forgang geta komist fyrr að.

Forgangur að leikskóla

Börn við sérstakar aðstæður geta fengið forgang inn í leikskóla. Þú sækir um forgang á Mínum síðum. Í sumum tilvikum þarf að fylgja vottorð frá viðurkenndum greiningaraðilum.

Hægt er að sækja um forgang fyrir:

• Fötluð börn (vottorð um greiningu).
• Börn með þroskafrávik (vottorð um greiningu).
• Börn sem búa við erfiðleika, til dæmis barnaverndarmál (vottorð frá félagsmálayfirvöldum). 
• Börn sem eiga foreldra eða systkini með alvarleg veikindi eða fötlun (vottorð frá lækni eða öðrum opinberum aðilum).
• Börn sem eiga foreldra undir lögaldri (18 ára).
• Börn einstæðra foreldra með þrjú eða fleiri börn á framfæri og elsta barn er 9 ára eða yngra.
• Þríbura.

Sumarfrí og lokanir

Leikskólar í Hafnarfirði eru lokaðir 5 daga á ári vegna skipulagsdaga, auk þess eru 4 skertir skóladagar yfir árið vegna skipulags skólastarfs. Hægt er að sjá skóladagatal hvers leikskóla fyrir sig á vefsíðum leikskólanna. 

Börn taka að lágmarki fjögurra vikna samfellt sumarleyfi. Leikskólar í Hafnarfirði eru lokaðir síðustu tvær vikurnar í júlí. Það er ekki rukkað fyrir leikskólagjöld meðan á sumarfríi og lokunum stendur.

Sjálfstætt starfandi leikskólar

Þú getur óskað eftir dvöl í einkareknum leikskóla fyrir barnið þitt og fengið gjaldið niðurgreitt ef leikskólinn er með uppeldisstefnu sem er afgerandi frábrugðin leikskólum Hafnarfjarðar. Foreldrar í fullu námi geta sótt um einkarekna leikskóla frá 12 mánaða aldri barns.