Leikskólar
Leikskólinn er fyrsta skólastigið. Þar er hlúð að börnum með skapandi og hvetjandi starfi.
Farsæld barna
Farsæld barnaMargs konar stoðþjónusta er fyrir hendi í leikskólum, til dæmis sérkennsla, snemmtæk íhlutun, greiningar, ráðgjöf og námskeið. Á vefsíðum hvers leikskóla er hægt að sjá úrræði sem eru í boði í þeim skóla.
Farsæld barna
Á Íslandi hafa ný lög um samþætta þjónustu í þágu farsældar barna tekið gildi. Þau eiga að sjá til þess að börn og foreldrar hafi greiðan aðgang að þeirri þjónustu sem þau þurfa og fái rétta aðstoð á réttum tíma, frá réttum aðilum.
Öll börn undir 18 ára aldri og fjölskyldur þeirra skulu hafa aðgang að tengilið þjónustu í þágu farsældar barns eftir því sem þörf krefur. Tengiliður farsældar er fyrsti snertiflötur foreldra og stuðningur. Hlutverk hans er að hafa hag barnsins í forgrunni og vinna með barni og foreldrum.
- Hlustar á þig og veitir upplýsingar um þá þjónustu sem er í boði.
- Skipuleggur stuðninginn í samráði við þig og barnið.
- Hjálpar þér að koma málinu af stað og fá mat á þörfum barnsins.
Þegar barn er við nám í leik-, grunn-, eða framhaldsskóla er tengiliður þjónustu í þágu farsældar barns starfsmaður skólans þar sem barnið er við nám eða leik.
Sérkennsla
Markmiðið með sérkennslu í leikskólum er að tryggja að börn njóti leikskóladvalarinnar og fái fjölbreytilega kennslu sem taki mið af þörfum barnsins. Leikskólar bera ábyrgð á að börn sem þess þurfa hljóti sérkennslu.
Í hverjum leikskóla starfar sérkennslustjóri sem er faglegur umsjónarmaður sérkennslu skólans. Sérkennslu- og kennsluráðgjafar starfa sem tengiliðir barna.
Í einhverjum tilvikum getur barn þurft að sækja stuðning utan leikskóla, til dæmis iðjuþjálfun, sjúkraþjálfun eða talþjálfun. Umsækjendur senda beiðni til deildarstjóra greiningar- og ráðgjafadeildar.
Sálfræðiþjónusta
Sálfræðingar leikskóla gera athuganir á leikskólabörnum og veita starfsfólki leikskóla og foreldrum ráðgjöf. Beiðnir um sálfræðiþjónustu þurfa að berast til sérkennslustjóra leikskóla á þar til gerðu eyðublaði, sem útfyllt er í samstarfi foreldra og leikskóla. Samþykki foreldra fyrir beiðni þarf alltaf að liggja fyrir.
Talmeinaþjónusta
Talmeinafræðingar gera athuganir á leikskólabörnum og veita starfsfólki leikskóla og foreldrum ráðgjöf. Beiðnir um athugun talmeinafræðings þurfa að berast til sérkennslustjóra leikskóla á þar til gerðu eyðublaði, sem útfyllt er í samstarfi foreldra og leikskóla. Samþykki foreldra fyrir beiðni þarf alltaf að liggja fyrir.
Uppeldi – PMTO foreldrafærni og SMT skólafærni
PMTO stendur fyrir „Parent Management Training – Oregon aðferð“, sem er aðferð fyrir foreldra og aðra sem koma að uppeldi. PMTO er gagnreynd aðferð sem dregur úr hegðunarerfiðleikum barna og unglinga og eflir foreldra í hlutverki sínu. Fjölbreytt úrræði, námskeið og ráðgjöf er í boði fyrir foreldra.
SMT-skólafærni er hliðstæð aðferð og PMTO þar sem lögð er áhersla á að koma í veg fyrir og draga úr hegðunarvanda.