Þriggja kvölda fræðsla fyrir foreldra unglinga

Við erum þorpið

„Við viljum reglulega valdefla þorpið okkar og höfum sérstaklega horft til tímabila þegar mikil samvera er framundan. Aðventan og jólafríið geta bæði verið álagstími og mjög gefandi samvera. Þess vegna ákváðum við að skella upp þessu fyrirlestramaraþoni fyrir fjölskyldurnar,“ segir Jóna Rán Pétursdóttir, forvarnarfulltrúi Hafnarfjarðarbæjar.

Fræðslan spannar þrjú kvöld og tekur á málefnum sem hafa verið áberandi í umræðu um unglinga og fjölskyldur síðustu misseri. Andleg líðan, áhrif samfélagsmiðla, frammistöðubætandi efni og jafnvægið milli hlýju og skýrra marka í uppeldi eru meðal viðfangsefna.

Þrjú kvöld – þrjú ólík viðfangsefni

sérstakrar stílsíðu.

Að vera sinn eigin besti bandamaður

Skoðum nú fyrirlestrana saman. Sá fyrsti fjallar um hvernig ungmenni geta lært að standa með sjálfum sér og tekist á við mótlæti, höfnun, samskiptaörðugleika og áskoranir í námi og félagslífi. Við fáum til okkar bandaríska sérfræðinginn Karen Bluth. Jóna segir mikinn feng að fá hana hingað í fjörðinn okkar.

„Við vitum að börnin okkar munu ekki ganga á bleiku skýi út lífið. Það er ákveðin ró fólgin í því að geta gefið þeim verkfæri til að takast á við erfiðar aðstæður,“ segir hún og hvetur foreldra til að gefa sér þennan tíma og fá þau verkfæri sem þarf.

Unglingar og ólögleg efni

Á öðru kvöldinu skoðum við frammistöðubætandi efni, fæðubótarefni og markaðssetningunni sem unglingar mæta á samfélagsmiðlum. Fulltrúar Lyfjaeftirlitsins fara yfir rannsóknir, staðreyndir og áhættu í umhverfi þar sem unglingunum er lofað að ná skjótum árangri.

„Við sjáum mikla markaðssetningu og hraða þróun. Þetta er að mörgu leyti gamla sagan um að selja eftirsóknarvert útlit, en nú er hraðinn orðinn meiri og loforðin um að árangur nánist samstundis,“ segir Jóna Rán.

Hún segir mikilvægt að foreldrar og unglingar fái upplýsingar beint frá fagfólki fremur en þeim sem hafa hagsmuni af sölu varanna.

Listin að vera leiðinlegt foreldri

Á þriðja kvöldinu fjallar Ársæll um þá jafnvægislist að vera hlýtt og styðjandi foreldri en jafnframt setja skýr mörk. Hvernig bregðumst við við þegar reynir á þolinmæðina og hvernig höldum við ró okkar þegar uppeldið verður krefjandi?

„Kynslóðirnar hafa sveiflast enda á milli í uppeldinu, frá því að vera mjög ströng yfir í að vilja fyrst og fremst vera vinir barnanna okkar. Nú erum við að reyna að finna jafnvægið, halda í traustið og samskiptin en líka mörkin sem börnin þurfa,“ segir Jóna Rán.

Fjölskyldurnar velji eða mæti á allt

Jóna Rán segir að þegar fræðslan sé í boði þrjú kvöld í röð geti fjölskyldur valið þau viðfangsefni sem höfða mest til þeirra eða skipt með sér kvöldunum.

„Við höfum heyrt af foreldrum sem ætla að skipta þessu á milli sín, hver fer á hvaða kvöld. Aðrir ætla að mæta á allt saman. Við vitum að foreldrar eru uppteknir, meðal annars í frístundastarfi barnanna, og með þessu viljum við gefa sem flestum tækifæri til að nýta sér fræðsluna.“

• Allir viðburðirnir eru ókeypis

Við hvetjum foreldra til að mæta og sjálfsagt að taka unglinginn með!