Víðistaðaskóli vann spurningakeppni grunnskólanna

Víðistaðaskóli bar sigur úr býtum

„Þetta var mikið fjör og við erum mjög stoltir af þeim,“ segir Kristmundur Guðmundsson annar liðsstjórnanda spurningaliðs Víðistaðaskóla sem  vann spurningakeppni grunnskólanna á höfuðborgarsvæðinu í gærkvöldi. Úrslitakeppnin var haldin í ráðhúsi Reykjavíkur. Nína, Úlfar og Styrmir Ási skipuðu vinningsliðið en með þeim í spurningaliði skólans er Ragnar Halldór. Þau tóku bikarinn með heim í Hafnarfjörðinn. Til hamingju öll.

Æfa og keppa í hverri viku

Mikill áhugi er fyrir spurningakeppnum í Víðistaðaskóla og stýra Kristmundur og Birkir Már Viðarsson valnámskeiði þar sem krakkarnir undirbúa sig og keppa í hveri viku. „25 eru skráðir og oft koma fleiri, “ segir Kristmundur.

„Krakkarnir eru duglegir að koma og horfa á keppnir. Þetta er stemning og menning,“ segir hann. Víðistaðaskóli vann einnig Veistu svarið spurningakeppni grunnskólanna í Hafnarfirði.

„Þá hugsaði ég að það væri gaman fyrir þau að mæta fleiri flottum liðum í jafnri keppni og sjá liðið sem vinnur okkur. En þau unnu 25-15 í undanúrslitum og 24-16 í lokaviðureigninni.“

Innilega til hamingju Víðistaðaskóli.