10 hlutir til að gera í Hafnarfirði um Verslunarmannahelgina

Verslunarmannahelgi í Hafnarfirði

Verslunarmannahelgin er framundan. Mörg verðum við á faraldsfæti. Mörg kjósum við svo að vera heima. En hvað má þá gera hér í Hafnarfirði? Jú, það er ansi margt.

1. Búðarrölt og kaffi

Yndislegt að ganga Strandgötuna, kíkja í búðir á laugardegi frá hádegi til kl. 14. Strand49, Litla hönnunarbúðin, Kakí og fleiri frábærar verslanir bíða þín. Opnunartíminn misjafn en sumar til 16. Frábært að enda gönguna með því að heimsækja Brikk á Norðurbakkanum sem er opið til klukkan 16 alla daga. Ef labbað er á strandstígnum meðfram höfninni má sjá ljósmyndir frá byggðasafninu okkar.

Mynd/Brikk

2. Útihátíð í heimabyggð

Síðasta helgi bæjarhátíðarinnar Hjarta Hafnarfjarðar í Bæjarbíói er einmitt núna um Verslunarmannahelgina. Hreimur og Magni með Þjóðhátíðar PubQuiz í dag fimmtudag. Maggi Kjartansson með brekkusöng kl. 19 sama dag. Hjálmar Örn með partýbingó á föstudeginum. Ball í tjaldinu bæði föstudags og laugardagskvöld frá kl. 19.30, það seinna með Greifunum!

Mynd/Rec Media

3. Sól veitingastaður

Veitingastaðurinn Sól er falinn demantur við Hafnarfjarðarhöfn, staðsettur inni í gróðurhúsi. Þar borða gestir yfir gróskumiklu og blómlegri uppskeru. Einstök upplifun og maturinn frábær.

Mynd/Sól

4. Ratleikur Hafnarfjarðar 2025

Ratleikur Hafnarfjaðrar  á sér langa sögu og hefur í gegnum árin aukið áhuga fólks á útivist í upplandi Hafnarfjarðar. Leikurinn stendur fram í september. Lögð eru 27 merki vítt og breytt umuppland Hafnarfjarðar. Allir sem skila lausnum geta fengið útdráttarverðlaun eða verið útnefnd Léttfeti, göngugarpur eða þrautakóngur ratleiksins.

Mynd/Guðni Gíslason

5. Heimsókn í Hellisgerði

Hellisgerði er almenningsgarður, allur prýddur hrauni. Það er tilvalið að fara þangað með teppi og nesti og leyfa börnum að skoða sig um og njóta í þessu fallega umhverfi. Þar má einnig finna sögusýningu um Kaldársel í 100 ár. Byggðasafn Hafnarfjarðar kom upp sýningu á myndum frá þessum sumarbúðunum KFUM/K í Hellisgerði í byrjun sumars. Virkilega gaman er að skoða myndirnar þar.

6. Eldbökuð pizza – Hver stendst það?

Eðal að fara með börnin sín og gefa þeim eldbakaða pizzu. Á Sydhavn er boðið upp á allar hinar vinsælu Figo-pizzur ásamt fjölbreyttu úrvali annarra rétta og drykkja. Já, Sydhavn er nýr staður hér í Hafnarfirði sem hefur algjörlega slegið í gegn hjá okkur Hafnfirðingum.

Mynd/Sydhavn

7. Syndum inni ef rignir

Já, ef það mun rigna – sem útlit er fyrir –  getur verið gott að hafa þak yfir höfuðið. Sund í Ásvallalaug er ævintýraland fyrir börnin. Þau hlaupa um og njóta lífsins og við á eftir þeim og getum í það minnsta fagnað hreyfingunni. Barnalaugar, potta og gufur eru nú opnar í Ásvallalaug. Opnunartímar:

• Laugardagur 8-18
• Sunnudagur 8-17
• Mánudagur 8-17

8. Beggubúð – innlit í fortíðina

Sameina má marga viðburðina hér á ofan en um leið kíkja á sýningar byggðasafnsins á göngunni. Hefur þú komið inn í Beggubúð hér í Hafnarfirði.  Beggubúð er verslunarminjasafn Byggðasafns Hafnarfjarðar. Þetta er gamalt verslunarhús sem var byggt árið 1906 og stendur nú á lóð byggðasafnsins.  Opið alla daga frá 11-17.

Mynd/skjáskot

9. Frisbí á Víðistaðatúni

Einstök útivistarperla en Víðistaðatún er umkringt hrauni við Víðistaðakirkju og skátaheimli Hraunbúa. Nóg er að gera fyrir börnin. Þau geta leikið sér í aparólu, ærslabelg og kastala. Þar skógarlundur sem gaman er að leika sér. Þegar allir eru orðnir svangir er hægt að grilla í grillhúsi undir skyggni sem er rétt hjá kastalanum. Í garðinum er eini tennisvöllur Hafnfirðinga og sex holu frisbígolfvöllur. Já, og það er frítt á völlinn og ekki nauðsynlegt að bóka fyrirfram. Snilld.

10. Kíktu í klaustur

Það er einstök upplifun að keyra að Kamelklaustrinu í Hafnarfirði. Þar eru daglegar messur alla virka daga kl. 8 en klukkan 8.30 á sunnudögum. Öll erum við velkomin. Nunnurnar reka þar einstaka verslun sem ævintýralegt er að sjá sem og að bera klaustrið sjálft augum. Garður systranna fékk heiðurskjöld Snyrtileikans árið 2020.