Vinnuskólinn

Hvað er Vinnuskólinn?

Vinnuskóli Hafnarfjarðar býður öllum 14-17 ára unglingum í Hafnarfirði sumarstarf. Allir sem sækja um fá starf.

Af hverju að sækja um starf í Vinnuskólanum?

Þátttaka í Vinnuskólanum er gott tækifæri fyrir unglinga til þess að fá reynslu af því að vinna sér inn laun á hvetjandi hátt. Unglingar fá að snyrta og hirða bæinn sinn, kynnast nýjum félögum og læra um umhverfismál, mannleg samskipti og virðingu gagnvart starfinu sínu.

Hverjir geta sótt um í vinnuskólanum?

Allir unglingar sem búsettir eru í Hafnarfirði og verða 14–17 ára (2009-2012) á árinu geta sótt um vinnu hjá Vinnuskólanum. Unglingar sem eru á undan jafnöldrum sínum í grunnskóla geta fengið að byrja ári á undan í Vinnuskólanum. Það þarf samt a.m.k. að vera 13 ára í samræmi við reglugerð um vinnu barna og unglinga.

Hvað er unnið mikið?

14, 15 og 16 ára unglingar (fæddir 2010-2012) byrja að vinna 11. júní. 17  ára (2009) ungmenni hefja störf á sama tíma nema um sé að ræða starf á vegum samstarfsfélags – þá er það samningsatriði.

• 14 ára unglingar geta unnið 71 tíma
• 15 ára unglingar geta unnið 92 tíma.
• 16 ára unglingar geta unnið 118 tíma.
• 17 ára unglingar geta unnið 193 tíma. 

Er matarhlé?

Já, það er matarhlé á milli kl. 12–12:30. Auk þess eru tveir kaffitímar, fyrir hádegi kl. 10:30–10:45 og eftir hádegi kl. 14:30–14:45.

• Í kaffitímum er ætlast til að starfsfólk hafi hollt og gott nesti. Orku- og gosdrykki eru ekki leyfðir.

Hvenær eru laun borguð út?

Fyrri útborgun er 8. júlí og seinni útborgun 7. ágúst. Ef eitthvað er ógreitt er það greitt 1. september.

Hvað er launatímabil?

Það er tímabilið sem greitt er eftir um hver mánaðamót.

Í Vinnuskólanum er launatímabilið 20. til 19. hvers mánaðar. Þannig að vinna sem er unnin frá 20. maí til 19. júní er greidd út næstu mánaðamót á eftir (4.júlí).

Hvert fara launin?

Launin eru lögð inn á bankareikning hvers unglings og þurfa því allar bankaupplýsingar að fylgja umsókn. Aðeins er hægt að nota bankareikning unglingsins.

Hvað er rafrænn persónuafsláttur?

Allt fólk 16 ára og eldri fær skattaafslátt sem er kallaður persónuafsláttur. Öll fá sömu upphæð í afslátt sem er þá dregin af þeirri upphæð sem á að borga í skatt. Allir unglingar eldri en 16 ára þurfa að senda upplýsingar á vinnuskoli.skattkort@hafnarfjordur.is um hvernig eigi að nýta persónuafsláttinn. Ef verið er að nota persónuafslátt á öðrum vinnustað þarf að taka það fram og þá hvernig á að skipta persónuafslættinum.

Á vef RSK má sjá upplýsingar um persónuafslátt.

Hvert á að mæta?

Venjulega eru unglingar í hópi nálægt skólum – ef þið fáið úthlutun við grunnskóla þá er mæting við aðalinngang skólans á fyrsta degi vinnu. Ef þið fáið úthlutun á öðrum stað þá er mætingarstaður fyrsta vinnudags tekinn fram í samþykktarpósti sem berst frá Völu.

Er hægt að skipta um hóp?

Engar breytingar eru gerðar á hópum fyrstu dagana. Allar óskir er varða breytingar má senda á vinnuskoli@hafnarfjordur.is og skrifstofan sér hvort rými sé til breytinga. Yfirleitt raðast nemendur í hóp með jafnöldrum sínum úr sama skóla en ekki er gert ráð fyrir að vinir eða vinkonur raðist sérstaklega saman. Við lítum svo á að öllum sé hollt að kynnast nýju fólki og starfa með öðrum en sínum nánustu vinum.

Hvað á að gera ef maður veikist?

Forsjáraðilar þurfa að tilkynna forföll símleiðis til flokkstjóra eða rafrænt í gegnum Völu vinnuskóla. Vanti unglinga í vinnu dag eða hluta úr degi án þess að það sé tilkynnt á réttan hátt hafa flokkstjórar eða starfsfólk á skrifstofu samband við forsjáaðila.

Má reykja í vinnunni?

Nei. Vinnuskóli Hafnarfjarðar er tóbaks-, veip- og vímuefnalaus vinnustaður.

Reglur Vinnuskóla Hafnarfjarðar

Reglur Vinnuskóla Hafnarfjarðar gilda á vinnutíma og við félagsstörf á vegum skólans.

• Nemendur fylgja fyrirmælum leiðbeinanda og sýna samstarfsfólki og öðrum kurteisi og tillitsemi í starfi.
• Nemendur eru stundvísir, heiðarlegir og vinnusamir
• Niðrandi orðræða, rasismi, hótanir og einelti er ekki liðið í Vinnuskólanum.
• Nemendur skulu mæta til vinnu klæddir eftir veðrim með vinnuhanska og með nesti við hæfi. Orkudrykkir eru ekki leyfilegir.
• Sjoppu- og búðarferðir eru ekki leyfðar á vinnutíma, ekki heldur kaffitíma.
• Nemendur eiga að ganga vel og þrifalega um á vinnustað og fara vel með þau áhöld sem notuð eru.
• Nemendur bera ábyrgð á kostnaði ef það fremur skemmdarverk á eigum Vinnuskólans eða annarra.
• Nemendur bera ábyrgð á eigin eigum á vinnutíma.
• Farsímanotkun er óheimil nema með leyfi flokkstjóra.
• Vinnuskólinn er tóbakslaus vinnustaður, þetta gildir einnig um vape og nikótínpúða.

Brot á reglum Vinnuskólans

Vinnuskóli Hafnarfjarðar er vinnustaður sem leggur sig fram við að veita ungmennum öruggt umhverfi til að stíga sín fyrstu skref á vinnumarkaði. Hjá okkur gilda því reglur og eru afleiðingar ef þær eru ítrekað brotnar.

Fyrsta viðvörun: Við getum öll misstigið okkur, hlustum á flokkstjórann og bætum okkur.

Önnur viðvörun: Flokkstjóri gefur viðvörun númer tvö, verði ekki breyting á hegðun í kjölfar hennar verður nemenda vísað heim án launa.

Þriðja viðvörun: Nemanda er vísað heim. Nemanda er einnig vísað beint heim hafi það áfengi eða önnur bönnuð efni í fórum sínum á vinnutíma, beiti ofbeldi eða hefur í hótunum. Ávallt er haft samband við foreldra / forráðamenn í hvert skipti sem nemandi er sendur heim á vinnutíma.
Sé nemanda vísað heim þrisvar á starfstímabilinu er honum tafarlaust vísað úr starfi hjá Vinnuskóla Hafnarfjarðar.
Yfirleitt tekst að leysa öll vandamál áður en grípa þarf til brottvísunar en reynslan sýnir að samvinna á milli starfsfólk Vinnuskólans og foreldra er lykilatriði við að leysa úr málunum.