Bæjarstjóri skoðar framkvæmdir við Fjörukrána

Víkingaþorpið stækkar með nýrri hótelbyggingu

Undirbúningur í Víkingaþorpinu, Viking Village, var í fullum gangi fyrir kvöldið, þegar systurnar Birna og Unnur Viðarsdætur rekstarstjórar tóku á móti Rósu Guðbjartsdóttir bæjarstjóra vindasaman vetrarmorgun nú á dögunum.

Starfsemin er í miklum blóma þótt nú vetri, hótelnýtingin mikil enda sérstaða þorpsins og Fjörukrárinnar mikil. Þar hefur hvert handtak verið gert af alúð og staðurinn upplifun í hverju skrefi.

Hótelið verður fjögurra stjarna

Hótel Víking og Fjörukráin eru við Víkingastræti 1-3 og einkenna bæinn. Þjónustan er persónuleg enda fjölskyldufyrirtæki. Fjörukráin hefur verið rekin af föður þeirra Birnu og Unnar, Jóhannesi Viðari Bjarnasyni, síðan 10. maí 1990. Hún er landsþekkt fyrir víkingaveislur sínar og Víking Village í 7. sæti yfir þá ferðamannastaði sem mest var leitað að á netinu á höfuðborgarsvæðinu, svokallaða segla samkvæmt Markaðsstofu Höfuðborgarsvæðisins, í fyrra. Þær systur hafa nú tekið við rekstrartaumunum.

Birna og Unnur leiddu bæjarstjóra um Fjörukrána og sögðu söguna en einnig frá mikilli uppbyggingu sem nú stendur yfir. Nýtt fjögurra stjörnu hótel rís bakatil þar sem gert er ráð fyrir um 55 herbergjum til viðbótar við þau 54 sem nú eru í boði. Stílbragðið verður í anda víkinga og hönnunin í höndum Brynhildar Sólveigardóttur. Vatn leikur stórt hlutverk í upplifuninni. Sjón er sögu ríkari.

Eldra hótelið verður í kjölfar þess nýja endurnýjað í stíl við það gamla en nú er verið að steypa grunninn og segir Birna búast við að hótelið opni í janúar 2026. Þangað flytur morgunverðarsalurinn og fleiri herbergjum bætt við í núverandi húsnæði.

Jólavertíðin á næsta leiti

Fleiri þekkja þó Fjörukrána en hótelreksturinn í Víkingaþorpinu, Viking Village. Jólaundirbúningurinn stendur nú yfir og verða jólahlaðborð þar alla föstudaga og laugardaga frá 15. nóvember. Það er ljóst að þessi fjölskyldurekstur er á miklu skriði.

Bæjarstjóri hefur heimsótt fyrirtæki nú í haust. Góðar aðstæður eru fyrir fyrirtæki til vaxtar og framþróunar í Hafnarfirði. Mörg hafa einmitt byggt upp og flutt starfsemi sína í sveitarfélagið síðustu mánuði og ár.

„Við Hafnfirðingar erum stoltir af þessari perlu á Strandgötunni, sem litar bæjarlífið lífi og einkennir. Við hlökkum til að sjá nýja hótelið upprisið en það er mikilvægt að fjölga hótelrýmum í miðbænum, þau munu auka umsvif og efla mannlífið,“ segir Rósa. „Það er mikilvægt fyrir mig sem bæjarstjóra að hitta atvinnurekendur og heyra beint hvernig við í bænum getum staðið sem best við ólíkan rekstur.“

Já, það verður virkilega gaman að sjá Víkingaþorpið vaxa.