Rúna jarðsungin – flaggað í hálfa í Hafnarfirði

Markaði djúp spor með list sinni

Sigrún Guðjónsdóttir, listamaðurinn Rúna, verður jarðsungin í dag mánudaginn 18. maí frá Hafnarfjarðarkirkju. Rúna var fyrsti bæjarlistamaður Hafnarfjarðar, útnefnd árið 2005. Útförinni er streymt. Flaggað er í hálfa stöng víða um bæ nú þegar hún er jarðsungin.

„Með fráfalli hennar lýkur löngum og einstökum ferli sem markaði djúp spor í sögu íslenskrar myndlistar og hönnunar,“ ritar Aldís Arnardóttir, forstöðumaður Hafnarborgar í minningargrein í Morgunblaðinu í dag.

Eins og segir í inngangi um Rúnu í Morgunblaðinu fæddist hún í Reykjavík 15. nóvember 1926 en ólst upp á Tjarnarbraut 5 í Hafnarfirði. Hún lést á dvalarheimilinu Hrafnistu í Hafnarfirði 4. maí 2026.

Rúna, bæjarlistamaður 2005. Mynd/Guðni Gíslason

Rúna var dóttir hjónanna Guðjóns Guðjónssonar, skólastjóra Barnaskóla Hafnarfjarðar, og Ragnheiðar Jónsdóttur rithöfundar. Hún stundaði nám við Handíða- og myndlistarskóla Íslands á árunum 1943-1946 og lauk þá einnig teiknikennaraprófi frá Kennaraskóla Íslands.

Eiginmaður Rúnu var Gestur Þorgrímssonar og gengu þau í hjónaband árið 1946. Þau fluttu til Hafnarfjarðar eftir búsetu í Danmörku og bjuggu næstu árin í húsi foreldra hennar við Lækinn. Árið 1957 reistu þau, ásamt foreldrum Rúnu, stórfjölskylduhús á Laugarásvegi 7 í Reykjavík og höfðu þar vinnustofu sína í meira en tvo áratugi. Þau fluttu aftur til Hafnarfjarðar árið 1981, á Austurgötu 17, og höfðu vinnustofu í húsnæði gamla Málms.

„Líf og list Rúnu voru órjúfanlega tengd. Hún starfaði á fjölbreyttum vettvangi, frá frjálsri listsköpun til hönnunar, og var frumkvöðull í leirlist á Íslandi. Á ferli sínum átti hún sömuleiðis farsælt samstarf við virt alþjóðleg hönnunarfyrirtæki, auk þess að vinna að bókaskreytingum, ritlist, auglýsingum og veggmyndum, meðal annars í samstarfi við eiginmann sinn, Gest Þorgrímsson,“ segir Aldís.

Rúna bjó þar ein allt þar til hún fékk pláss á hjúkrunarheimili í ágúst síðastliðnum. Rúna og Gestur stunduðu bæði myndlistarkennslu í áratugi, hún meðal annars við Kvennaskólann í Reykjavík. Á sjöunda ártugnum myndlýsti hún nokkurn fjölda bóka og skrifaði eina barnabók, Rauða fiskinn.

Segja má að hún hafi slegið í gegn 1974 þegar hún sigraði í samkeppni um þjóðhátíðarplatta, sem fóru víða. Rúna varð ástsæll myndlistarmaður og er einkum þekkt fyrir postulínsflísar sínar sem hún málaði á og á seinni árum vann hún töluvert stærri verk á japanskan pappír, einnig vann hún að nokkrum utanhússverkum með Gesti og þau unnu jafnframt við keramik eftir að þau komu sér upp vinnustofu og aðstöðu til þess á Laugarásveginum.

Rúna lét talsvert til sín taka í félagsmálum myndlistarmanna og var kjörin fyrsti formaður Sambands íslenskra myndlistarmanna Rúna og Gestur eignuðust fjögur börn: elstur er Þorgrímur, Ragnheiður næst, þá Guðjón Ingi en Ingibjörg Þóra er yngst. Barnabörnin eru 13, barnabarnabörnin 17 og eitt barnabarnabarnabarn.

„Fyrir hönd Hafnarborgar sendum við fjölskyldu og vinum Rúnu innilegar samúðarkveðjur og þökkum um leið Rúnu fyrir hennar ómetanlega framlag til lista og menningar. Minning hennar lifir í verkunum sem halda áfram að tala til okkar með sínum einstaka hljómi,“ segir í lokaorðum forstöðumanns Hafnarborgar. Hafnarfjarðarbær tekur heilshugar undir og vottar fjölskyldunni samúð.

Útför hennar er klukkan 13. Nálgast má streymið hér. www.mbl.is/utfarir-i-dag