Dagur Norðurlandanna

Dagur Norðurlandanna er haldinn hátíðlegur vítt og breytt um öll Norðurlöndin þann 23. mars ár hvert. Hafnarfjarðarbær er aðili að norrænu vinabæjarkeðjunni með Frederiksberg í Danmörku, Uppsala í Svíþjóð, Bærum í Noregi og Hämeenlinna í Finnlandi. Þá á Hafnarfjörður vinabæina Tvöroyori í Færeyjum og Illulissat í Grænland. Samvinna á milli bæjanna byrjaði eftir heimsstyrjöldina síðari þegar þeim fannst þörf á að styrkja sambandið á milli Norðurlandaþjóðanna.

Ráðhús Hafnarfjarðar á degi Norðurlandanna 23. mars

Fánum Norðurlandanna var flaggað við ráðhúsið á Norræna daginn 23. mars.

Í dag leggja þessir vinabæir aðallega áherslu á menningarleg samskipti, íþrótta- og viðskiptaleg tengsl og hittast reglulega á vinabæjarmótum sem haldin eru annað hvert ár. Mótin samanstanda af uppákomum æskulýðs-, íþrótta og menningarhópa frá bæjunum auk ráðstefna og málþinga um hin ýmsu sameiginlegu málefni norrænu bæjanna. Vinabæjarkeðjan stuðlar einnig að heimsóknum skólahópa og þekkingarheimsókna á milli staðanna.

Í mörg ár hafa Norrænu félögin staðið fyrir fjölbreyttum viðburðum 23. mars og mun Höfuðborgardeild Norræna félagsins standa fyrir dagskrá í Norræna húsinu kl. 16 – 18.15 þennan dag í samstarfi við Norræna félagið á Ísland, Norræna húsið, Norrænu ráðherranefndina og Norðurlandaráð og eru öll hvött til að mæta.