12 hafnfirsk félög fengu rúmar 13 milljónir króna

Hafnarfjarðarbær og Rio Tinto með börnunum

Tólf hafnfirsk íþróttafélög fengu samtals 13,2 milljónir króna úr sameiginlegum styrktarsjóði Rio Tinto og Hafnarfjarðarbæjar miðvikudaginn 25. júní 2025.

Íþróttastyrkurinn er afhentur við athöfn í álverinu í Straumsvík fyrir 18 ára og yngri iðkendur aðildarfélaga Íþróttabandalags Hafnarfjarðar (ÍBH). Rannveig Rist, forstjóri Rio Tinto á Íslandi, afhenti styrkina að viðstöddum Valdimar Víðissyni bæjarstjórinn í Hafnarfirði og Hrafnkeli Marinóssyni, formanni ÍBH. Þau rituðu einnig undir nýjan samning sem gildir fyrir árin 2025-2027 á milli Íþróttabandalagsins í Hafnarfirði, Rio Tinto og Hafnarfjarðarbæjar.

24 milljónir á ári

Rio Tinto og Hafnarfjarðarbær greiða 12 milljónir króna árið 2025 hvor inn í samstarfið til stuðnings íþróttum barna í Hafnarfirði. Úthlutanir styrkja eru í júní annars vegar og hins vegar í desember út frá umsóknum félaga og reglum samningsins.

Upphæðin nú, 13,2 milljónir króna, er um 55% upphæðarinnar. Horft er til  iðkenda sem æfa að minnsta kosti 2 sinnum í viku og fjóra mánuði yfir árið.

Börnum á bakvið styrkinn fjölgar

Sótt var um stuðning vegna 5419 barna í fyrra en 5631 börn í ár. Fjölgaði börnunum því um 212 börn milli ára.

Eftirtalin félög fengu stuðning út frá samningi og umsóknum:

• Fimleikafélag Hafnarfjarðar kr. 4.346.084.
• Knattspyrnufélagið Haukar kr. 3.251.359.
• Fimleikafélagið Björk kr. 1.861.268.
• Brettafélag Hafnarfjarðar kr. 1.261.161.
• Sundfélag Hafnarfjarðar kr. 860.309.
• Dansíþróttafélag Hafnarfjarðar kr. 534.470.
• Badmintonfélag Hafnarfjarðar kr. 489.931.
• Golfklúbburinn Keilir kr. 311.774.
• Hestamannafélagið Sörli kr. 187.533.
• Bogfimifélagið Hrói Höttur kr. 46.883.
• Blakfélag Hafnarfjarðar kr. 25.786.
• Íþróttafélagið Fjörður kr. 23.442.

Til hamingju öll með styrkinn og öflugt íþróttalíf í Hafnarfirði.