Bæjarlistarmaðurinn Ebba Katrín ólst upp við lækinn

Ebba Katrín er bæjarlistamaðurinn 2024

Hver er Ebba Katrín? „Hún er þriggja bræðra systir. Ólst upp í Setbergi í Hafnarfirði, alla mína barnæsku,“ svarar bæjarlistarmaður Hafnarfjarðar 2024. Kynnumst henni enn betur: „Ein í bræðrahópi með læk í bakgarðinum.“

Ebba Katrín Finnsdóttir er fædd 1992. Hún byrjaði ung að leika og steig fyrst á stokk hér í Hafnarfirði í Setbergsskóla þar sem hún var í grunnskóla. Hún gekk í Versló og útskrifaðist af leikarabraut Listaháskóla Íslands 2018. Hún hóf starfsferilinn í Borgarleikhúsinu en starfar nú í Þjóðleikhúsinu. Þetta leikárið er hún í sýningunum Orði gegn orði, Frosti og Ellen B. Í Borgarleikhúsinu lék hún meðal annars í Rómeó og Júlíu þar sem hún var einnig einn tónlistarhöfunda. Einnig Uglu í Atómstöðinni-endurliti og fékk hún Grímuverðlaun fyrir. Ebba Katrín lék í Nokkrum augnablikum um nótt, Ást og upplýsingum og Meistaranum og Margarítu.

Fjölhæf leikkona

Ebba Katrín hefur fengið lofsamlega dóma og tekið þátt í fjölda uppfærslna. Hún hefur ekki aðeins leikið á sviði heldur einnig Sjónvarpi. Hún lék í Mannasiðum á RÚV, í kvikmyndinni Agnesi Joy, þáttaseríunum Venjulegu fólki 2 og 3. Þá hefur hún leikið í stuttmyndunum og Áramótaskaupinu. Nú síðast sáum við hana í aðalhlutverki í þáttunum Húsó. Þá leikur hún um þessar mundir í fjögurra þátta seríu um Vigdísi Finnbogadóttur sem Vesturport gerir.

Ebba Katrín er eins og við vitum bæjarlistamaður Hafnarfjarðar 2024. „Ég er stolt. Mér finnst þetta mikill heiður og mér finnst þetta líka vera eldmóður. Nú langar mig að gera betur, fara í mastersnám og skila einhverju til baka. Ég er strax farin að hugsa: Hvernig get ég haldið áfram og gefið til baka það sem ég fékk þegar ég var yngri í bænum. Rétt eins og fólk hélt utan um mig þegar ég var að þroskast,“ segir hún um titilinn í myndbandi sem sýnt var þegar hann var veittur. „Mér finnst þetta æði.“

Sjáðu myndbandið hér.

Hvernig hófst leiklistarferill Ebbu Katrínar?

„Ég fer á sumarnámskeið í Hafnarfjarðarleikhúsinu þegar ég er barn, tek þátt í Jólastjörnunni á sal í Setbergsskóla. Það var fyrsta framkoman. Svo fer ég í Sönglist og er í leiklist í grunnskóla þegar hægt var að velja leiklist sem val. Er í Versló og boltinn fer að rúlla. Svo vorum við í Konubörnum, settum upp leikrit, skrifuðum sjálfan, sýndum yfir 20 sýningar í Gaflaraleikhúsinu undir stjórn Bjarkar. Algjör kjarnaminning,” segir Ebba Katrín

Hvað er eftirminnilegast á ferlinum þínum hingað til og af hverju?

„Konubörn er það sem við skrifuðum sjálfar og var okkar listaverk. Mér fannst svo fallegt að við fengum allar höfnun en létum það ekki brjóta okkur, heldur sköpuðum og erum allar að vinna þessu tengt í dag. Vorum sex saman,“ lýsir hún.

„Svo myndi ég segja Húsó. Mér finnst það frábært að prófa að gera bíó. Ég er að leika í Vigdísi Finnboga-seríunni. Algjör heiður. En kannski líka ef ég ætti að velja tvennt í leikhúsinu, Konubörn sem á stað í hjarta mínu og einleikurinn núna, sem er eldskírn; Orð gegn orði.“

Áttu þér einhvern uppáhalds stað í Hafnarfirði?

„Ég myndi segja að það væri Lækjarbergið þar sem ég ólst upp. Það er algjör uppáhaldsstaðar. Það er yndislegt að labba með læknum upp að Káldárseli. Hellisgerði er líka ótrúlega flott. Uppáhaldsstaðirnir mínir eru allir þeir þar sem fólkið mitt býr, Klettahraunið. Kjarninn er Setbergið.“

Hvað þýðir það fyrir þig að vera bæjarlistamaður? Stolt? Kom það á óvart?

„Kom á óvart? Já. Mér finnst ég svo ung og eiga enn eftir að gera svo mikið. Ég horfi upp fyrir mig á fyrirmyndir og hafði ekki séð mig í sigti fyrir bæjarlistamann Hafnarfjarðar. Spurði: ertu viss? Það er svo skrýtið að vera leikari. Allt er túlkað í gegnum augu annarra og maður er ekki dómbær á það sem maður gerir. Svo finnst einhverjum eitthvað og öðrum hitt. Leiklist er ekki eins og málaralist og mér finnst ég því enn að stíga inn í að ég sé listamaður,“ segir hún hreinskilin.

„Þetta er heiður sem kveikir í mér að vilja til að gera meira og halda áfram á þessari braut. Algjör innspýting,“ segir hún.