Hátt í 3.000 hátíðargestir skemmtu sér í sólinni í Hellisgerði

Sagan segir að í Hellisgerði sé eitt mesta þéttbýli huldufólks á Íslandi

Það var sannkallað stuð fyrir alla fjölskylduna í brakandi blíðu á glæsilegri hátíð í Hellisgerði í gær, sunnudaginn 25.ágúst. Þar mátti heyra sögu um spennandi ævintýri bókaálfsins, grilla sykurpúða, spreyta sig í sirkus, búa til risa sápukúlur, skylmast, dansa og syngja við hressandi tóna með Benedikt Búálfi, Mæju jarðaber, Íþróttaálfinum og Kjalar, svo fátt eitt sé nefnt. Um garðinn allan mátti sjá fólk á öllum aldri í búningum, með álfaeyru og blóm í hárinu. Gróf talning gesta hljóðar upp á 3.000 manns. Það er því óhætt að segja að stemmningin og gleðin hafi verið allsráðandi í Hellisgerði í gær. Krakkar og kynlegir kvistir nutu þess að klífa hraunið, upplifa umhverfið og njóta samverunnar með fjölskyldu og vinum í garðinum fagra.

Vettvangur upplifunar og leikja fólks á öllum aldri

Hellisgerði er hrauni prýddur skrúðgarður í hjarta Hafnarfjarðar hvaðan Hafnfirðingar og vinir Hafnarfjarðar eiga góðar minningar og sögur síðustu áratugina. Garðurinn hefur frá upphafi þjónað mikilvægu samfélagslegu hlutverki sem grænt svæði, samverustaður og vettvangur upplifunar og leikja fólks á öllum aldri. Hellisgerði hefur hin síðustu ár stimplað sig inn sem heimur ljósadýrðar og ævintýra á aðventunni og hafa þúsundir gesta lagt leið sína í garðinn í aðdraganda jóla um leið og hið sívinsæla Jólaþorp í Hafnarfirði er heimsótt.

Hér má sjá nokkrar vel valdar myndir frá hátíðinni í ár