Náttúran fangar athyglina á tveimur sýningum í Hafnarborg

Náttúran í myndum Hafnarborgar

„Það hreyfir við manni að sjá hvernig listamaðurinn varpar ljósi á náttúruna,“ segir Aldís Arnardóttir, safnstjóri Hafnarborgar, og horfir á verk Péturs Thomsen listamanns sem eru til sýnins í safninu til 16. febrúar. Ljósmyndir sem við fyrstu sýn leikmanns virðast í þrívídd.

„Já, ég hef séð fólk leggja kinnarnar við vegginn til að sjá hvort svo sé,“ segir Aldís og brosir að fullyrðingum leikmannsins sem nú hleypur um safnið og dáist að verkunum áður en þessi texti er skrifaður.

„Myndirnar tala til manns,“ segir hún. „Pétur sýnir okkur hvernig ljósmynd getur verið annað og meira en við höfum flest hugmyndir um. Myndirnar hafa mikið aðdráttarafl og hreyfa við manni.“

Auk sýningar Péturs, Landnám,  stendur nú yfir í safninu sýning Arngunnar Ýrar sem kallast Kahalii. Þær kallast á við myndir Péturs, enda fjalla þær báðar um jarðrask, breytingar á landslagi, þótt með ólíkum hætti sé. Hann myndar. Hún málar.

Í lýsingu á sýningu Péturs segir að athafnir mannkyns undanfarnar aldir hafi breytt heiminum svo mjög að talað sé um nýtt jarðsögulegt tímabil: mannöldina (e. Anthropocene). Hann hafi unnið að sýningunni í nokkur ár en sýnir verkin nú í fyrsta sinn sem heild á einkasýningu.

Pétur Thomsen er fæddur 1973 og lauk MFA-prófi í ljósmyndun frá École nationale supérieure de la photographie í Arles, Frakklandi, árið 2004. Áður stundaði hann nám í frönsku, listasögu og fornleifafræði við Université Paul Valéry í Montpellier og listljósmyndun við École supérieure des métiers artistiques í sömu borg. Pétur hefur hlotið ýmis verðlaun og viðurkenningar en árið 2004 hlaut hann til að mynda verðlaun LVMH-samsteypunnar sem þá voru veitt ungum listamanni í 10. sinn. Hann var svo útnefndur af Musée de L’Élysée í Lausanne sem einn af 50 ljósmyndurum sem líklegir væru til að setja mark sitt á ljósmyndasögu framtíðarinnar í verkefninu reGeneration: 50 Photographers of Tomorrow. Pétur býr og starfar í Sólheimum í Grímsnesi.

Málverk Arngunnar Ýrar til vinstri og ljósmynd Péturs Thomsen til hægri. Verkin eru hluti af sýningu þeirra í Hafnarborg.

Landnýting á striga

Arngunnur Ýr sýnir ný og nýleg málverk og beinir sjónum sínum að eigin landnámi á Hawaii, auk þess að leiða hugann að samspili umhverfis, sögu og landnýtingar.

„Listakonan byggir verkin á mótífum af gróðri sem einkennir svæðið og veltir fyrir sér eigin forréttindastöðu sem aðkomumaður, þar sem hún fær að njóta lands sem er mörgum utan seilingar. Þá fanga verkin einnig þá togstreitu sem myndast þegar nær ósnortin náttúra umbreytist í nýja byggð,“ segir í lýsingu sýningarinnar.

Arngunnur Ýr er fædd 1962 og útskrifaðist með BFA-gráðu í málaralist frá San Francisco Art Institute árið 1986. Hún var síðar gestanemi við Gerrit Rietveld-akademíuna í Amsterdam, Hollandi, 1989 til 1990 en sneri aftur til Kaliforníu og lauk meistaragráðu í málaralist frá Mills-háskólanum í Oakland árið 1992. Hún hefur hlotið ýmis verðlaun og viðurkenningar fyrir verk sín, svo sem úr sjóði Svavars Guðnasonar og Ástu Eiríksdóttur og árið 2005 hlaut hún styrk frá Pollock-Krasner Foundation. Verk hennar hafa verið sýnd hér á landi, í Evrópu og Bandaríkjunum og eru verk eftir hana ýmist í eigu opinberra safna, stofnana og einkasafnara, bæði hér á landi sem erlendis. Arngunnur býr í Kaliforníu og á Íslandi.

Hafnarborg er opin alla daga nema þriðjudaga. Aðgangur að safninu er ókeypis. Þetta er því tækifæri sem vert er að grípa og njóta.

Opnunartímar