Grunnskólastarf verður aftur með óbreyttu sniði

Tekin hefur verið sú miðlæga ákvörðun fyrir grunnskóla í Hafnarfirði að grunnskólastarf verði aftur með óbreyttu sniði. Hefst full kennsla samkvæmt stundaskrá í flestum árgöngum skólanna fimmtudaginn 7. janúar eða í síðasta lagi mánudaginn 11. janúar í einstaka skólum. Nær þetta einnig til valgreina og kennslu skólaíþrótta í íþróttahúsum og sundlaugum hjá öllum nemendum.  Hver skóli mun eða hefur þegar tilkynnt forráðamönnum hvenær breytingarnar taka gildi hjá viðkomandi nemendum. 

Matarþjónusta í eðlilegt horf 

Með þessari breytingu mun matarþjónusta komast í eðlilegt horf, þ.e. hafragrautur að morgni og hefðbundin matarþjónusta í matsal skóla fyrir alla nemendur. Grímuskylda nemenda leggst af með öllu. Í flestum skólum flyst frístundastarf aftur úr skólastofum yngri nemenda í frístundaheimili og morgungæslan verður með sama fyrirkomulagi og í haust. Í einhverjum skólum þarf að nýta áfram hluta af skólastofunum.  Önnur starfsemi sem hliðra þurfti til vegna hólfunar færist í flestum tilfellum aftur á sinn stað.  Áfram verða þó ýmsar takmarkanir í gangi varðandi skólastarfið. Þannig verða óbreyttar reglur varðandi heimsóknir foreldra, þ.e. þær eru ekki heimilar nema sérstök þörf sé á og að foreldrar séu boðaðir í skóla. Aðgengi annarra sem styðja við skólastarfið er einnig takmörkuð og grímuskylda er meðal fullorðinna eftir ákveðnum leikreglum.

Núverandi sóttvarnarreglur gilda til 28. febrúar nk.