Gunnhildur Sigurðardóttir fjallkonan 2026

Fjallkona Hafnarfjarðar 2026

Gunnhildur Sigurðardóttir er fjallkona Hafnarfjarðar 2026. Hún flutti Vígsluljóð á Ráðhússviðinu í dag, á þjóðhátíðardegi okkar. Hægt var að fylgjast með því þegar Guðrún Hildur Rosenkjær festi skaut, höfuðfatið, á Gunnhildi í Hafnarborg fyrir flutning ljóðsins. Guðrún lýsti þá einnig tilurð skautbúningsins.

Á þessum þjóðhátíðardegi 2026 heiðruðum við merka sögu St. Jósefsspítala sem fagnar hundrað ára afmæli sínu þann 5. september. Í heila öld hefur St. Jó staðið vörð um líf, líðan og von. Í veggjum hans búa minningar kynslóða og í sögu hans speglast saga Hafnarfjarðar.

Gunnhildur er fyrrverandi hjúkrunarforstjóri spítalans. Svona hljóðar ljóðið:

Vígsluljóð 

spítala heilags Jósefs í Hafnarfirði

          Sjá húsið rísa glæst – , af föstum grunni

                            og geyma þúsund vona fyrirheit -;

           það hús skal vígjast – helgum líknarbrunni

                            og heillagjafi reynast – bæ og sveit -;

                      og mannúð hreinni merki það skal bera

                 og máttugt standast – næstu tímamót -,

gegn heilsutjóni vígi það skal vera

                 og vinna sjúkum mönnum heilsubót. –

Ég sé þann lýð, með svitadögg á enni,

      er sækir heill til gleði önnur drótt,

                    Hann biður þess, að blessuð sólin renni,

      hann biður Guð, að stytta hverja nótt.

           En þrauta andvörp þúsundanna mætast -,

                 og þessi bæn sem voldugt öldurót -;

          „ Ó Drottinn minn, lát drauma mína rætast -;

      ó Drottinn, veit mér sjúkum heilsubót!

Vér biðjum þess, að bölið sjúkdóms-viðja,

      það bæti Drottins máttur hjálpar fús.

Vér biðjum þess, að blessist líknar iðja,

                            og blessun Drottins gisti þetta hús;

að drottinn hæða líkn þeim sjúka leggi

      og ljósi varpi gegnum þrauta húm,

að friður Drottins vígi hússins veggi,

      að vefji Drottins mildi hvert þess rúm.

                                                                                           Stefán frá Hvítadal

HELSINGJAR

ljóðabók útg. 1927

Gunnhildur, sem er 84 ára, var í viðtali í Sjónvarpsfréttum á þessum þjóðhátíðardegi. Hún sagðist hissa þegar hún fékk símtal og sagt að hún hefði verið útnefnd fjallkona Hafnarfjarðar. „Ég hugsaði með mér: Ertu að grínast? Því að gömul kona, hvað á hún að gera upp á svið!“ sagði hún í léttum rómi.

En það var svo sannarlega tilefni. Gunnhildur starfaði 40 ár á St. Jó spítalanum.

„Þetta er magnað ljóð sem að sýnir það að það var mikil blessun á bakvið þetta allt saman og það var líka þrungið því að hjálpa fólki. Það var ekkert sjúkrahús á þessu svæði, nema bara sjúkrahúsið Landakot í Reykjavík.“