Rólegra umhverfi, lengri leiktími og aukin gæði

Rólegra umhverfi, lengri leiktími og aukin gæði í samskiptum

Verkefnið Hæglæti í leikskólastarfi varð til í kjölfar niðurstaðna úr starfsmannakönnun á leikskólanum Hlíðarenda þar sem starfsfólk upplifði álag í starfi, þrátt fyrir litla starfsmannaveltu, góðan aðbúnað og reynslumikið starfsfólk. Það varð kveikjan að því að skoða hvernig mætti skapa meira jafnvægi og ró í daglegu starfi. Bryndís Guðlaugsdóttir leikskólastjóri sagði okkur frá verkefninu – sem fékk styrk úr Menntasjóði Hafnarfjarðar í vor. Deildarstjóri við leikskólann Hlíðarenda gerði meistaraverkefni í námi sínu sem fjallaði um hæglæti og sjálfbærni í skólastarfi. Þegar stjórnendur fóru að ræða saman um niðurstöður verkefnisins og stöðuna í leikskólanum varð til sameiginleg sýn um að hæglæti gæti verið leið til að bæta bæði líðan starfsfólks og gæði starfsins.

„Við fórum markvisst að vinna að því að kynna hugmyndafræði hæglætis fyrir starfsfólki og fljótlega kom í ljós að skilningur á hugtakinu var mjög mismunandi. Sum tengdu hæglæti við að „gera allt hægt“ eða draga úr virkni, á meðan önnur áttu erfitt með að skilja hugtakið þar sem íslenska var ekki móðurmál þeirra. Því þurftum við að byrja á grunni og ræða hvað hæglæti þýðir í raun í leikskólastarfi,“ segir Bryndís. 

Dagskipulag leikskólans endurskoðað 

Fyrstu skrefin fólust meðal annars í því að endurskoða dagskipulag leikskólans. Markmiðið var að fækka skiptistundum, lengja samfelldan leiktíma barna og skapa meira svigrúm fyrir starfsfólk til að vera til staðar í samskiptum og leik barna, án þess að stöðugt flýta sér á milli verkefna. „Áherslan er á að börn læri í gegnum leik og að starfsfólk geti betur gripið þau námstækifæri sem skapast náttúrulega í leiknum.“ Bryndís segir verkefnið hafa þróaðist hratt áfram og orðið til þess að stjórnendur sóttu sér frekari fræðslu um hæglætis. „Verkefni okkar allra er að kynna sér að einhverju marki bókina Slow Knowledge and The Unhurried Child eftir sálfræðinginn Alison Clark, fyrir næsta haust. Hún er aðgengileg starfsfólki, bæði í prentuðu og rafrænu formi. Þannig getum við leitast við að byggja upp sameiginlegan skilning á því hvað felst í hæglæti og hvernig hugmyndafræðin getur orðið hluti af daglegu starfi.“

Fræðsla fyrir starfsfólk á skipulagsdögum

Mótuð hefur verið mótuð áætlun fyrir næsta skólaár þar sem meðal annars verður boðið upp á fræðslu fyrir starfsfólk á skipulagsdögum og stofnaður hópur þeirra sem vilja taka virkan þátt í áframhaldandi þróunarvinnu. „Við munum leggja áherslu á að verkefnið sé okkar allra saman. Sú viðurkenning sem verkefnið hefur fengið með tilkomu menningarstyrksins hefur haft mikil áhrif á starfsandann og aukið áhuga starfsfólks á að taka þátt í þróuninni. Við erum mjög þakklát hér,“ segir Bryndís kát og minnir á hversu mikilvæg viðurkenning og jákvæð endurgjöf eru í starfsumhverfi. Starfsfólk upplifi að það sé séð og metið fyrir þá vinnu sem það leggur á sig daglega og sú tilfinning skili sér beint til barnanna. 

Langtímaverkefni með hugarfarsbreytingu 

Þá segir Bryndís að til standi að breyta skipulagi starfsins til að skapa meira rými og ró í húsinu. „Til dæmis verður bætt við starfsfólki sem sér um útivistarferðir með hluta barnahópsins á hverjum degi. Með því verða færri börn inni á deildum í einu, sem stuðlar að rólegra umhverfi, lengri leiktíma og auknum gæðum í samskiptum barna og starfsfólks.“ Lögð er áhersla á að þetta sé langtímaverkefni og ákveðin hugafarsbreyting fremur en skammtímalausn. Bryndís segist líta svo á að samfélagið einkennist í dag af miklum hraða og stöðugu áreiti, bæði hjá börnum og fullorðnum. Því sé mikilvægt að leikskólinn verði staður þar sem börn fái svigrúm til að dvelja í leik, njóta róar og upplifa öryggi í hægara og yfirvegaðra umhverfi. Að lokum sé markmiðið ekki að gera minna heldur að gera hlutina með meiri nærveru, meiri ró og meiri tilgangi, bæði fyrir börn og starfsfólk.

Síðustu vikur og á næstu vikum munu viðtöl við styrkhafa úr Menntasjóði Hafnarfjarðar vera birt á miðlum Hafnarfjarðarbæjar. Þannig gefst íbúum og öðrum áhugasömum tækifæri til að fá dýpri innsýn í frábær verkefni og skapandi skóla- og frístundastarf.