Horft til framtíðar – saga barnsins

Ferilmöppur sem segja sögu leikskólabarna

Skarðshlíðarleikskóli fékk styrk úr Menntasjóði Hafnarfjarðar fyrir verkefnið Horft til framtíðar – saga barnsins, sem snýst um að efla og samræma gerð ferilmappa barna í leikskólanum. Berglind Kristjánsdóttir, skólastjóri Skarðshlíðarleikskóla, segir markmiðið vera að skapa vandað, faglegt og samræmt verklag sem fylgi barninu alla leikskólagönguna. Skarðshlíðarleikskóli hefur verið starfandi frá því í ágúst árið 2019 og þar er gert ráð fyrir 80 börnum. Starfsfólkið er 26 talsins og hefur frá upphafi unnið með ferilmöppur barna. Nú stendur hins vegar til að þróa þá vinnu enn frekar, samræma verklag milli deilda og nýta styrkleika starfsfólksins betur í sameiginlegri vinnu. „Við vildum ná að útbúa vandaðar ferilmöppur fyrir öll börnin okkar sem sýna faglegt leikskólastarf og námsferil barns alla leikskólagöngu þess,“ segir Berglind Kristjánsdóttir, skólastjóri Skarðshlíðarleikskóla.

Mikilvægt verkfæri í leikskólastarfinu

Ferilmöppur eru ekki aðeins safn mynda eða minninga úr leikskólanum. Berglind segir þær vera mikilvægt faglegt verkfæri sem geti gefið góða mynd af framvindu barnsins í leik og starfi. Í möppunum verði meðal annars uppeldisfræðilegar skráningar um áhugasvið barnsins, nám þess og þroska. Þær upplýsingar nýtist kennurum til að ígrunda þann lærdóm sem hefur átt sér stað og skoða hvernig hægt sé að styðja barnið enn betur í framhaldinu. „Þar sem mappan fylgir barni á milli deilda hjálpar það kennurum sem taka við barninu að sjá hvar barnið er statt hverju sinni,“ segir Berglind. Hún leggur áherslu á að með verkefninu sé verið að horfa á heildarmyndina; að ferilmappan verði lifandi skjal um sögu barnsins í leikskólanum, en um leið tæki fyrir starfsfólk til að efla faglega umræðu og markvissa skráningu.

Samræmt verklag milli deilda

Skarðshlíðarleikskóli hefur frá upphafi unnið með ferilmöppur, en Berglind segir að fram að þessu hafi vantað meiri samhljóm milli deilda. Með nýju fyrirkomulagi sé markmiðið að bæta úr því. „Tilgangurinn er að samræma verkferla, þannig að grunnurinn og innihald ferilmöppunnar sé ætíð sá sami, burtséð frá deild eða hvaða starfsmaður hefur komið að möppunni í gegnum árin,“ segir hún. Hugmyndin að breyttu fyrirkomulagi varð til í kjölfar samráðsfundar þar sem nokkrir starfsmenn höfðu áður unnið að sambærilegum verkefnum á öðrum starfsstöðum á höfuðborgarsvæðinu. Sú reynsla sýndi, að sögn Berglindar, að vandaðar ferilmöppur geta fengið góðar móttökur bæði innan leikskólans og utan hans. Hún segir slíkar möppur jafnframt geta sýnt á skýran hátt fram á það faglega starf sem fer fram innan veggja leikskólans. Vel unnar ferilmöppur séu dýrmæt leið til að gera leikskólastarfið sýnilegt.

Styrkleikar starfsfólksins nýttir betur

Nýjungin í verkefninu felst ekki aðeins í samræmingu gagna og verklags, heldur einnig í því hvernig starfsfólkið vinnur saman að ferilmöppunum. „Við ætlum að nýta styrkleika hvers og eins starfsmanns í að vinna ferilmöppurnar saman,“ segir Berglind. „Við ætlum að vera dugleg við að skiptast á hugmyndum og nýta þverfaglegt starf milli deilda.“ Markmiðið sé að ferilmöppurnar verði unnar í sameiningu og að starfsfólk læri hvert af öðru í ferlinu. Þannig geti verkefnið orðið liður í starfsþróun, aukið öryggi í vinnubrögðum og styrkt faglega samvinnu innan leikskólans. Berglind segir væntingar standa til þess að verkefnið skili sér bæði til starfsfólks og barna. Fyrir starfsfólkið geti það aukið fagmennsku, samvinnu, starfsöryggi og vellíðan í starfi. Fyrir börnin skapi það betri yfirsýn yfir nám þeirra og þroska, auk þess sem þau fái að eiga fallega og vandaða sögu um leikskólagönguna sína.

Möppur sem börnin mega skoða

Styrkurinn úr Menntasjóði Hafnarfjarðar mun fyrst og fremst nýtast til efniskaupa. Fjárfesta þarf í endingargóðum gæðamöppum sem geta haldið utan um mikið magn skráninga og gagna og þolað daglega notkun. Auk þess verður lögð áhersla á að varðveita innihaldið vel, meðal annars með plastvösum og plöstun, enda eiga möppurnar að vera aðgengilegar börnunum sjálfum. „Við viljum að börnin fái að skoða möppur sínar reglulega,“ segir Berglind. Þannig verði ferilmappan ekki aðeins skjalasafn fyrir kennara og foreldra, heldur hluti af upplifun barnsins sjálfs. Hún verði saga þess, sögð í gegnum leik, nám, áhugasvið, samskipti og þroska.

Síðustu vikur og á næstu vikum munu viðtöl við styrkhafa úr Menntasjóði Hafnarfjarðar vera birt á miðlum Hafnarfjarðarbæjar. Þannig gefst íbúum og öðrum áhugasömum tækifæri til að fá dýpri innsýn í frábær verkefni og skapandi skóla- og frístundastarf.